(මීරිගම විශේෂ - පුෂ්පකුමාර මල්ලවආරච්චි)
මීරිගම නගරයේ දංඕවිට හන්දියේ පසුගියදා (18) පැවැති උත්සව අවස්ථාවට එක් වූ පුද්ගලයෙකු හොඳ හැටි සප්පායම් වීමෙන් පසු ඔහු පැමිණි යතුරුපැදිය එතැන දමා කුලී ත්‍රිරෝද රියකින් නිවසට ගොස් පෙරේදා (19) උදේ පැමිණ බලද්දී යතුරුපැදිය අතුරුදන් වී තිබීමේ පුවතක් මීරිගම පොලිසියෙන් වාර්තා වෙයි.


මීරිගම හල්පේ ප්‍රදේශයේ පදිංචිකරුවෙකි. ඔහු මදුරුවා යන අන්වර්ථ නාමයෙන් හඳුන්වන කුඩා යතුරුපැදියෙන් පසුගිය 18 දා නගරයට පැමිණ ඇත. දහවල් 12ට පමණ ඔහු පැමිණෙන අවස්ථාවේ මීරිගම දංඕවිටට හැරෙන හන්දියේ පැවැති ජය සැමරුම් උත්සවයට එක් වී ඇත්තේ වරින් වර තැබෑරුමකට ද යමින් එමිනි.


පැය කිහිපයක් මේ ස්ථානයේ විනෝදයෙන් කල් ගත කළ මෙම අය පස්වරු 3ට පමණ කුලී ත්‍රිරෝද රියකින් නිවසට ගොස් ඇත. හොඳ හැටි නිදා ගත් ඔහු රාත්‍රියේ නවයට පමණ අවදි වූ පසු යතුරුපැදිය නොමැතිව නිවසට පැමිණ ඇති බව හෙළි වී ඇත. අනතුරුව පෙරේදා (19) උදේ හොඳ හැටි සිහි එලවා ගත් ඔහු නගරයට පැමිණ පරීක්‍ෂා කර ඇතත් යතුරුපැදිය සොයා ගැනීමට හැකි වී නැත. අනතුරුව ඔහු මේ බව මීරිගම පොලිසියට පැමිණිලි කරනු ලැබූයේ උදේ දහයට පමණය. මීරිගම පොලිස් ස්ථානාධිපති ප්‍රධාන පොලිස් පරීක්ෂක ප්‍රියන්ත මහතාගේ මෙහෙයවීම මත අපරාධ විමර්ශන අංශය ස්ථානාධිපති උපපොලිස් පරීක්ෂක එම්.පී. විමලරත්න මහතා පරීක්ෂණ පවත්වයි.