ඇය කුරුණෑගල දිස්ත‍්‍රික්කයේ තරුණියකි. දැනට මාස කිහිපයකට පෙර ආයතනයක රැකියාවට කොළඹ පැමිණ මිතුරියකගේ නිවෙසේ නැවතී රැකියාවට ගියාය. පසුගිය දිනක ඇය සුපුරුදු පරිදි සේවයට පැමිණි අතර ඇයගේ නමට කුරුණෑගල නිවෙසට විදුලි පණිවිඩයක් ලැබුණි. එහි සඳහන් වූයේ ”සේවයට වාර්තා කරන්න, නැතහොත් පහත දැක්වෙන අංකයට කතා කරන්න” යනුවෙනි. පියා මව ඇතුළු නෑදෑ හිතවතුන් බියට පත්වී ක්‍ෂණිකව ඇයගේ ජංගම දුරකථනයට කතා කළත් ප‍්‍රතිචාරයක් නොවීය. කලබලවූ සියල්ලෝම වාහනයකින් කොළඹ බලා පිටත්වූහ. පැය කිහිපයකින් කොළඹට ළඟාවූ ඔවුන් කෙලින්ම ගියේ දියණියගේ සේවා ස්ථානයටය. මව්පියන් දුටු දියණිය පුදුමවී ඔවුන් ළඟට පැමිණියාය. මව දියණිය බදාගෙන හඬන්නට වුවාය. එවිට දියණිය, මොකක්ද අම්මේ කරදරයක්දැයි විමසුවාය. පියා විදුලි පණිවිඩය ඇය අත තැබීය. එය කියවූ දියණිය පුදුමයට පත් වී පියා සමග තම කාර්යාලයට ගොස් විදුලි පණිවිඩය නිලධාරින්ට පෙන්නුවාය. ඔවුන් ඇයගේ පෞද්ගලික ලිපිගොනුව බැලූවිට එහි ඇය නොදන්වා සේවයට නොපැමිණි බව සඳහන් ලිපියක් විය. ”වැරැද්ද අපේ. ඔයා අවුරුද්දකට කලින් අපිගාව වැඩ කරලා දන්වන්නේ නැතිව නැවතුනානේ. ආයෙත් අවේ මාස ගාණකට පස්සෙනේ. ඔයා නැවත සේවයේ පිහිටවූ ලියුම ෆයිල් කරන්න බැරිවෙලා. නොදන්වා සේවයෙන් ඉවත්වූ ඔක්කෝටම අපි ටෙලිග‍්‍රෑම් යැව්වා. ඒ අනුව අතපසුවීමකින් ඔයාටත් යවලා.” නිලධාරියා කාරණය පැහැදිලි කළේය. අවසානයේදී වාහන ගාස්තුව වශයෙන් රුපියල් පන්දහසක මුදලක් මව්පියන්ට ගෙවීමට සිදුවිය.