(උණවටුන ඩී.ජී. සුගතපාල)
 කොරෝනා වයිරසය පැතිර යාමත් සමග ගාල්ල නගරයේද ආරක්ෂාව තරකිරීමට ආරක්ෂක අංශ සහ සෞඛ්‍ය අංශ පියවර ගත්තේය.


ගාල්ල පොලිසිය අවටද, කොටුවට පිවිසෙන මාර්ගද, කළුවැල්ල ප්‍රදේශයද, දිස්ත්‍රික් ලේකම් කාර්යාලය අසල ද ඇතුළු වැදගත් ස්ථාන රැසකට පිවිසෙන ජනතාවට සෞඛ්‍යාරක්ෂිත ක්‍රමවේද අනුගමනය කිරීමට ආරක්ෂක අංශ උපදෙස් දුන්නේය.


 මේ නිසා නගරයට පැමිණෙන ජනතාවගේ අඩුවක්ද දක්නට ලැබිණි. රජයේ කාර්යාලවලට සහ අධිකරණයට පැමිණි ජනතාවද හැකි ඉක්මනින් ගම්බිම් බලා යාමට පියවර ගත්තේය.


මේ තත්ත්වය නිසා විශේෂයෙන්ම තමන්ගේ ආදායම් ඉලක්කය සපුරා ගැනීමට නොහැකිව කම්පනයට පත්ව සිටි පිරිසක්ද වූහ. ඒ නගරයේ සිඟමනේ යෙදී සිටි යාචක පිරිස්ය. ඔවුන් අතර ගාල්ල පොලිසියේ තාප්පය අයිනේ සිට සිඟමන් යදින පුද්ගලයෙක් ද විය. ඔහු දිනපතා රාජකාරියට පැමිණෙන පුද්ගලයකු ලෙස පැමිණ තාප්පය අයිනේ සිට සිඟමනේ යෙදීම සිරිත විය.


ආරක්ෂක අංශ විසින් ආරක්ෂාව තර කිරීමත් සමග ඔහුට එම ස්ථානයෙන් ඉවත් වන ලෙස දන්වා සිටියත් ඔහු ඉවත්වූයේ නැත. පසුව ආරක්ෂක නිලධාරීන් ඔහු එම ස්ථානයෙන් ඉවතට කැඳවාගෙන ගියේය. .


එසේ කැඳවාගෙන ගොස් ඔහුගේ බෑග් ඇතුළු අනෙකුත් භාණ්ඩ දැඩි සෝදිසියකට ලක් කළහ. ආරක්ෂක නිලධාරීන්ගේ දෑස් උඩ ගියේය. නෝට්ටුවලින් පමණක් රුපියල් හතළිස් දෙදහසක මුදලක් යාචකයා සතුවිය. සිඟාකෑම මොනතරම් වාසිදායක දැයි එහි සිටි අය පවසනු ඇසිණි.