කුඩා දරුවන් සමාජ මාධ්‍යවලට ඇබ්බැහි කළේ යැයි ෆේස්බුක් සහ ඉන්ස්ටග්‍රෑම් යන සමාජ මාධ්‍යවල හිමිකාරීත්වය දරණ, ‘මෙටා’ සමාගමේ ප්‍රධානී මාර්ක් සකර්බර්ග්ට චෝදනා එල්ල වී ඇත.

එම චෝදනා සම්බන්ධයෙන් මාර්ක් සකර්බර්ග්ට ලොස් ඇන්ජලීස් අධිකරණයක් හමුවේ පෙනී සිටීමට ද සිදුවිය. පැවැති එම නඩු විභාගයේ සකර්බර්ග්ට ජූරි සභාවක් ඉදිරියේ සාක්ෂි දීමට සිදුවුණු බවත්, සකර්බර්ග් ජූරි සභාවක් ඉදිරියේ මෙසේ සාක්ෂි දුන් පළමු අවස්ථාව මෙය බවත් මාධ්‍ය  වාර්තා පෙන්වා දෙයි.

නඩුව ගොනු කර ඇත්තේ දැනට 20 හැවිරිදි තරුණියක විසින් බව ද පැවැසෙයි. එම තරුණිය පෙන්වා දී ඇත්තේ කුඩා කල සිටම ෆේස්බුක්, ඉන්ස්ටග්‍රෑම් සහ යූටියුබ් භාවිත කිරීම නිසා තමා දැඩි ලෙස ඇබ්බැහි වූ බවත්, එයින් ඇති වූ මානසික පීඩනය හේතුවෙන් තමා විශාදය සහ සියදිවි නසාගැනීමේ සිතුවිලිවලින් පීඩා විඳි බව‍ය.

පැමිණිලිකාර පාර්ශවයේ නීතිඥ මාර්ක් ලැනියර් විසින් මෙටා සමාගමේ රහස් අභ්‍යන්තර ඊමේල් පණිවිඩ සහ පර්යේෂණ වාර්තා කිහිපයක් අධිකරණයට ඉදිරිපත් කරනු ලැබුණි. 

එසේ ඉදිරිපත් කළ එක් වාර්තාවක සඳහන් වූයේ ඉන්ස්ටග්‍රෑම් භාවිත කරන නව යොවුන් දරුවන් එයින් තමන්ට හානියක් සිදුවන බව දැන දැනත් එයට දැඩි ලෙස ඇබ්බැහි වී ඇති බවය.

අවුරුදු 13 ට අඩු දරුවන්ට ඉන්ස්ටග්‍රෑම් තහනම් බව මෙටා සමාගම ප්‍රකාශ කළ ද, 2019 වසරේ යොමු කළ අභ්‍යන්තර ඊමේල් පණිවිඩයකින් අනාවරණය වි ඇත්තේ, එම නීති නිසි ලෙස ක්‍රියාත්මක නොවන බවය.  

ඇමෙරිකාවේ වයස අවුරුදු 10-12 අතර දරුවන්ගෙන් සියයට 30 ක් පමණ ඉන්ස්ටග්‍රෑම් භාවිත කරන බවත්එහි සඳහන් වෙයි. 2015 වසරේ සකර්බර්ග්, සිය විධායක නිලධාරීන්ට ලබා දුන් ඉලක්කයක් මගින් පරිශීලකයන් ඉන්ස්ටග්‍රෑම් තුළ ගත කරන කාලය සියයට 12 කින් වැඩි කිරීමට උපදෙස් දී තිබූ බව ද අධිකරණය හමුවේ අනාවරණය විය.

සකර්බර්ග් අධිකරණයට කියා සිටියේ එම ලේඛන වැරදි ලෙස අර්ථකථනය කර ඇති බවය. 
දරුවන්ගේ ආරක්ෂාව වෙනුවෙන් තම සමාගම විවිධ මෙවලම් හඳුන්වා දී ඇති බවත්, පරිශීලකයින් ගත කරන කාලය මැන බැලීම සිදු කරන්නේ ඔවුන්ට ලබා දෙන සේවාවේ වටිනාකම තක්සේරු කිරීමට මිස ඇබ්බැහි කරවීමට නොවන බවත් ඔහු පැහැදිලි කළේය. 

කෙසේ නමුත් දරුවන් මෙම සමාජ මාධ්‍යවවලට ඇබ්බැහිවීමක් සිදුවන්නේ නම්, තමන් ඒ ගැන කනගාටුව පළ කරන බව ද සකර්බර්ග් පැහැදිලි කළේය.