උපුල් වික්‍රමසිංහ
ඩිජිටල් හැඳුනුම්පත් නිකුත් කිරීමේ ව්‍යාපෘතිය සඳහා ඉන්දියාව මුදලින් අධාර කරන්නේ එම ව්‍යාපෘතිය ඔස්සේ මෙරට පුරවැසියන්ගේ දත්ත ඔවුන්ට ලබා ගැනීම වෙනුවෙන් වූ අල්ලසක් වශයෙන් බවත් එමගින් එම ව්‍යාපෘතියෙහි ටෙන්ඩරය ලබා ගැනීම ඉන්දියාවේ අභිලාෂය වී ඇති බවත් ජන අරගල ව්‍යාපාරය සඳහන් කරයි.

එම ව්‍යාපාරයේ ජාතික විධායක සභික වසන්ත මුදලිගේ ඉරිදා ලංකාදීපයට පැවසුවේ දත්ත එකතු කිරීම සඳහා අවශ්‍ය තාක්ෂණික සහාය ලබා දීම පමණක් ඉන්දියානු සමාගම කරන බවටත් එම සමාගමට අදාළ දත්ත නොයන බවටත් වැඩබලන ඩිජිටල් ආර්ථික අමාත්‍යවරයා පැවසුව ද ඉන්දියානු සමාගමට පැහැදිලිවම මෙම දත්ත ලබා ගත හැකි බවත් ඩිජිටල් හැඳුනුම්පතකට මුහුණෙහි හැඩය, ඇස්වල කළු ඉංගිරියාව වැනි දත්ත අවශ්‍ය ඇයි ද යන්න ප්‍රශ්න කරන බවත්ය.
මෙම දත්ත ව්‍යාපාර කටයුතු වෙනුවෙන් භාවිත කිරීමේ අනතුරක් ඇති බවත් එයින් රටේ ආරක්ෂාවට හා ස්වෛරීත්වයට අහිතකර බලපෑම් එල්ල විය හැකි බවත් හෙතෙම කීවේය. මේ සම්බන්ධයෙන් වත්මන් රජය ගත් අමාත්‍ය මණ්ඩල තීරණය රටට හෙළි කරන්නැයි අභියෝග කරන බව ද ඔහු ප්‍රකාශ කළේ ය.
මේ අතර අන්තර්ජාලය හා තොරතුරු තාක්ෂණ විශේෂඥයකු වන හර්ෂ විජයවර්ධන මහතා ඉරිදා ලංකාදීපයට පැවසුවේ මෙරට පුරවැසියන්ගේ දත්ත අදාළ ඉන්දියානු සමාගමට ලබා ගැනීමේ හැකියාව පවතින බවය.
ඇඟිලි සලකුණු දත්ත එකතු කිරීමට අදාළ තාක්ෂණික දැනුම ශ්‍රී ලංකාව සතුව තිබිය දී එය වෙනත් රටක සමාගමකට ලබා දෙන්නේ ඇයි දැයි ප්‍රශ්න කළ ඔහු දැනට ලබා ගන්නා ජෛවමිතික දත්තවලට අමතරව ඉදිරියේදී ඩී.එන්.ඒ. ලබා ගැනීමට කටයුතු කළ හොත් එය රටේ ජාතික ආරක්ෂාවට බරපතළ තර්ජනයක් විය හැකි බවට ද අනතුරු ඇඟෙව්වේය.