(පුෂ්පකුමාර ජයරත්න)

ආණ්ඩුකාර ධූරයේ බලය සහ රාජ්‍ය බලය යොදාගනිමින් ෂාෆි ෂිහාබ්ඩීන් වෛද්‍යවරයා විසින් සිදුකර ඇති බව පැවසෙන අපරාධ හා වංචනික ක්‍රියා යටපත් කිරීමට සූදානම් නොවන ලෙසත් එසේ වුවහොත් අසාද් සාලි ආණ්ඩුකාරවරයාට සහ රජයට එරෙහිව ජනතාව පාරට බස්සවන බවත් අද (27) කුරුණෑගල ශික්ෂණ රෝහලට පැමිණි පාර්ලිමේන්තු මන්ත්‍රී අතුරලියේ රතන හිමියෝ පැවසූහ.

කුරුණෑගල ශික්ෂණ රෝහලට පැමිණි රතන හිමියෝ රෝහල් පාලනාධිකාරිය සමඟ සහ රෝහලේ සියලුම සේවා අංශවලට සම්බන්ධ වෘත්තීය සමිති නියෝජිතයන් හමුවී දීර්ඝ වේලාවක් උද්ගතව පවතින මෙම ගැටලුව සම්බන්ධයෙන් සාකච්ඡා කළහ.

ඉන් අනතුරුව රෝහලට පැමිණිලි ඉදිරිපත් කිරීමට පැමිණ සිටි මව්වරුන්ට රතන හිමියන් හමුවූ අවස්ථාවේදී ඔවුහු හඬා වැටෙමින් තම දුක් ගැනවිලි ඉදිරිපත් කළහ.

අසාධාරණයකට ලක්වූ මව්වරුන්ට උපරිම සාධාරණයක් ඉෂ්ට කරදීම සඳහා තමන් මැදිහත් වන බව රතන හිමියෝ පැවසූහ.

ෂාෆි ෂිහාබ්දීන් වෛද්‍යවරයාට පාර්ශ්ව කීපයකින් එල්ලවී ඇති චෝදනා විමර්ශනය කරමින් රටට ජනතාවට සාධාරණයක් ඉෂ්ට කරදීමට නීතියට අනුකූලව වෙහෙසෙන වෛද්‍ය කාර්ය මණ්ඩල සහ පොලිස් නිලධාරීන්ව මාරුකර යැවීමටත්, ඔවුන්ට බලපෑම් එල්ල කිරීමත් නොකරන ලෙස ආණ්ඩුවේ අමාත්‍යවරුන්ට තරයේ දන්වා සිටින බවද උන්වහන්සේ පැවසූහ.

මින් පසුවට මහපාරේ සිට මේ රට පාලනය කරන්නේ භික්ෂූන් වහන්සේලා ඇතුළු මහජනතාව බවද ප්‍රකාශ කළ රතන හිමි මෙම වෛද්‍යවරයා සම්බන්ධයෙන් අනිසි බලපෑම් නොකොට සාධාරණ පරීක්ෂණයක් පැවැත්වීම ආණ්ඩුවේ වගකීමක් බවද පෙන්වා දුන්හ.

මේ දරුණු සිංහල ජාතිය වඳ කිරීමේ සාහසික අපරාධයට ෂාෆි ෂිහාබ්දීන් වගකිවයුතු බව සනාථ වුවහොත් ඔහුට ඉහළම දඬුවම් නියම කළ යුතු බවද රතන හිමි අවධාරණය කළහ.