(අනීෂා මානගේ)

මාස දෙකක කාලයක් තිස්සේ ආරක්ෂක මණ්ඩලය රැස් නොවීම වරදක් බවද ඉන් පැහැදිලි වන්නේ නිලධාරීන් තමන්ගේ වගකීම් ඉටු නොකළ බව යැයිද විපක්ෂනායක මහින්ද රාජපක්ෂ මහතා අද (30) තංගල්ලේ දී කීය.

පසුගිය වසරේ පැවති පළාත් පාළන මැතිවරණයේ දී ස්වාධීන කණ්ඩායමකින් ඉදිරිපත් වී ගාල්ල කොට්ඨාසයෙන් වැඩිම මනාප දිනාගත් අනුරාධ ගයාන් ලොකුයද්දෙහිගේ මහතා ගාල්ල මහ නගර සභාවේ නාගරික මන්ත්‍රීවරයකු ලෙස විපක්ෂනායක මහින්ද රාජපක්ෂ මහතා ඉදිරියේ දිවුරුම් දුන්නේය.

එම ස්වාධීන කණ්ඩාමයේ නායක යූ.ජී.කුලතිලක මහතා වසරක කාලයක් මන්ත්‍රීවරයකු ලෙස පත්ව සිටි අතර ඉන් පසුව අනුරාධ ගයාන් මහතා දිවුරුම් දුන්නේය.

මන්ත්‍රීවරයා තංගල්ල කාර්ල්ටන් නිවෙසේ දී දිවුරුම් දීමෙන් පසුව විපක්ෂ නායක මහින්ද රාජපක්ෂ මහතා මාධ්‍යවේදීන් වෙත සිය අදහස් ප්‍රකාශ කළේය.

"මගේ කාලයේ දී නම් ආරක්ෂක මණ්ඩලයට සතියකට වාරයක් රැස් වුණා. ඒක තමයි යුද්ධය අවසන් කරන්න පුළුවන්කම ලැබුණේ. බුද්ධි අංශ තොරතුරු ගැන යුද්ධයේ තත්ත්වය ගැන හැමකෙනාම කරුණු ඉදිරිපත් කළා. යුද්ධය අවසන් වූවාට පසුවත් රැස්වුණා. මාස දෙකක් තිස්සේ ආරක්ෂක මණ්ඩලය රැස්නොවීම ලොකු වරදක්. එයින් පැහැදිලි වෙන්නේ නිලධාරීන් තමන්ගේ වගකීම් ඉටු නොකළ බව. අදාළ නායකත්වයත් එයට උනන්දුවක් දක්වා නැහැ. මොකද ඉතාමත් පහසුවෙන් ලැබුණු නිසා අවබෝධයක් නැතිකම තමයි මෙයට හේතුවක් වුණේ.

ඉන්දියාවෙන් 4 වැනි දා තොරතුරු ලැබුණා කියනවා. අවසානයේ දී 9 වැනිදා ලැබුණා කියනවා. නමුත් ඒ අය දන්නෙ නැහැ ලැබුණේ කොහෙන්ද කියලා. කොහොම හරි එදා රැස්වීම රැස්වුණ දවසේවත් ඒ ගැන කතා කරලා නැහැ. ඒ ගැන සොයා බලා කටයුතු කරන්න උනන්දුවෙලා නැහැ.

මේ අයට නීති අදාළ වෙන්නේ නැහැ. ඒ අය ඉන්නෙ නීතියට උඩින්. අපිට තමයි කෑ ගැහුවෙ. නමුත් මෙයයි දැන් රටේ තත්ත්වය" යැයිද ඔහු කීවේය.