(මාතලේ විශේෂ මහේෂ් කිර්තිරත්න)  

පාර්ලිමේන්තු මැති ඇමතිවරුන්ගේ වැටුප් වැඩිවීම වත්මන් ආණ්ඩුවේ යෝජනාවක් නොවන බවත් 2006 වසරේදී මහින්ද රාජපක්ෂ මහතා ජනාධිපති සමයේ  ගෙන ආ නීතියක් අනුව වැඩි වූ බව ව්‍යවසාය හා මහනුවර නගර සංවර්ධන අමාත්‍ය සහ සභානායක අධිනිතිඥ ලක්ෂ්මන් කිරිඇල්ල මහතා අද 04 මාතලේදී පැවැසීය.

ඒ මහතා මේ බව ප්‍රකාශ කළේ වතු කම්කරු ජනතාවට පර්චස් හතක ඉඩමක අයිතිය ලබා දිමේ “හරිත භුමි “වැඩසටහනේ දෙවන අදියර යටතේ මාතලේ දිස්ත්‍රික්කයේ වතු ජනතාවට ඉඩම් ඔප්පු ලබා දිමේ උත්සවයට සහභාගි වෙමිනි.එම උත්සවය මාතලේ අඹගහ බස් නැවතුම්පළ අසලදී පැවැත්විණි.

මෙහිදි වැඩිදුරටත් දහස් දැක්වු අමාත්‍ය ලක්ෂ්මන් කිරිඇල්ල මහතා මෙසේද පැවසීය.

‘මන්ත්‍රිවරුන්ගේ පඩිය  ඉහළ අධිකරණවල විනිසුරුවන්ගේ පඩියට සමාන විය යුතුයි කියලා නීතියක් ගෙනාවා. නමුත් ක්‍රියාත්මක වුණේ නැහැ. නමුත් පසුගිය කාලයේ විනිසුරුවරුන්ගේ පඩිය වැඩි වුණ නිසා මන්ත්‍රිවරුන්ගේ පඩියත් මහින්ද රාජපක්ෂ මහතා ගෙන ආ නීතිය අනුව වැඩි කරන්න සිද්ධ වුණා.
එතුමයි ඒ නිතිය ගෙනාවේ. මේ සම්බන්ධයෙන් ජුලි මාසේ 17 වැනිදා පාර්ලිමේන්තුවේ සාකච්ඡා කරනවිට පක්ෂ නායකයෝ සියලුදෙනාම හිටියා. මේකට කවුරුත් විරුද්ධ වුණේ නැහැ. මේ අය තාම ක්‍රියාත්මක නැහැ.

අපි ජනතාවගේ ප්‍රශ්න දන්නවා. නමුත් ප්‍රතිපත්තිය පිළිගත්තේ සියලු පක්ෂ නායකයින්ගේ කැමැත්ත අනුවයි. පසුගිය ජනාධිපතිවරණයේදිත්, මහමැතිවරණයේදීත් එක්සත් ජාතික පක්ෂයේ මැතිවරණ ප්‍රකාශනයේ සදහන් කළා එක්සත් ජාතික පක්ෂ ආණ්ඩුවක් බලයට පත්වුවහොත් අපි සැම වතු පවුලකට පර්චස් 7ක ඉඩම් අයිතිය ලබා දෙනවා කියලා. 2015 ජනවාරි 8 වැනිදා යහපාලන ආණ්ඩුව ඇති කළා. එවකට වැවිලි කර්මාන්ත ඇමතිවරයා ලෙස කැබිනට් පත්‍රිකාවක් දැම්මා. සෑම වතු පවුලකටම පර්චස් 7ක ඉඩම් අයිතිය ලබා දියයුතුයි කියලා. ඒ

යෝජනාවට ජනාධිපති මෛත්‍රිපාල සිරිසේන මහතා සහ අගමැති රනිල් වික්‍රමසිංහ මහතා ඇතුලු කැබිනට් මණ්ඩලයම සම්පූර්ණ  අනුමැතිය දුන්නා. ඒ අනුව තමයි අපිට පුළුවන් වුණේ මේ සංකල්පය ඉදිරියට  ක්‍රියාත්මක කරන්න.

 
වතු කම්කරු ජනතාව හැමදාම පුරවැසිකම් නැති පිරිස් බවට පත්වෙලා හිටියා. නමුත් එක්සත් ජාතික පක්ෂයෙන් තමයි පුරවැසි අයිතිවාසිකම ලබා දුන්නේ. මාතලේ දිස්ත්‍රික්කයේ වතු ජනතාවට ඉඩමක අයිතිය ලබා දෙනවා. .ඇමරිකන් ඩොලර් කෝටි 4000ක් විතර ණය ගත්තා. අද ලංකාවේ ආදයම මදි ණය ගෙවන්න. එවැනි ආර්ථිකයක් තමයි මහින්ද රාජපක්ෂ මහතා අපිට බාර දුන්නේ. නමුත් විවිධ දුෂ්කරතා මධ්‍යෙය් අපි ජනතාගේ සුභසාධන කටයුතු ආරම්භ කරලා තියනවා. අපිට මේ අවුරද්දේ ණය ගෙවන්න තියනවා ඇමරිකන් ඩොලර් මිලියන 1800ක්. ඊළඟ අවුරුද්දේ ගෙවන්න තියනවා 2021 දී අපිට ඇ.ඩො මිලියන 3100ක් ගෙවන්න තියනවා.

මේක තමයි මහින්ද රාජපක්ෂ ආණ්ඩුව අපිට උරුම කරලා ගියේ. අපි සිසු දරුදැරියන්ට සුරක්ෂා රක්ෂාණාවරණය දුන්නා. සමෘද්ධි සහනාධාරය වැඩි කළා. රාජ්‍ය සේවක පඩි වැඩි කළා. ඉන්ධන මිල අඩු කළා. මේ ආර්ථිකය සකස් කරන්න...රාජ්‍ය බැංකු හරහා දැන් අපි ණය ලබා දිමට කටයුතු කරමින් පවතිනවා. අපි මාතලේටත් ඒ වැඩපිළිවෙල දියත් කරනවා. ඒ වගේම නකල්ස් රක්ෂිතයේ එක බිම් අඟලක්වත් හෝටල් හදන්න අපි දිලා නැහැ. මැප් එකෙන් බලන්න පුළුවන් තාක්ෂනය තියනවා. අපි රක්ෂිත හදුනාගෙන තියනවා. මේ කෑ ගහන අයට අමතක වෙලා තියනවා 1995 පොදුජන ආණඩුව කාලයේ ඉඩම් අක්කර ලක්ෂ 6ක් වික්ක බව.. ඒතකොට කවුරුත් කතා කළේ නැහැ. කවුරුත් කට ඇරියේ නැහැ. නකල්ස් රක්ෂිතය ගැන කතා කරන අය මේක තියන තැනවත් දන්නේ නැහැ. අපි ලාභ ලබන වතු විකුණන්නේ නැහැ‘‘ යැයි  ඒ මහතා පැවසීය.

මෙම අවස්ථාවට කෘෂිකර්ම රාජ්‍ය අමාත්‍ය වසන්ත අලුවිහාරේ, සංචාරක සංවර්ධන හා ක්‍රිස්තියානු ආගමික කටයුතු රාජ්‍ය අමාත්‍ය රංජිත් අලුවිහාරේ, මාතලේ දිසා පාර්ලිමෙන්තු මන්ත්‍රි රෝහිණි කවිරත්න, පාර්ලිමෙන්තු මන්ත්‍රි වේලු කුමාර්,මධ්‍යම පළාත් සභා මන්ත්‍රි ඒ.එච්.එම් ඉබ්‍රාහිම්,මාතලේ මහ නගරාධිපති ඩල්ජිත් අලුවිහාරේ .මාතලේ මහ දිසාපති කරුණාසිරි පෙරේරා.ඇල්කඩුව වැවිලි සමාගමේ සභාපති නෙලු විජේදාස.ඇල්කඩුව වැවිලි සමාගමේ සාමාන්‍යාධිකාරි රෝෂාන්ත පෙරේරා. යන මහත්ම මහත්මින් ඇතුලු වතු ජනතාව විශාල පිරිසක් එක්වි සිටියහ.