(යොහාන් භාසුර)

බස්නාහිර පළාත් සභාවේ හිටපු අමාත්‍යවරයෙක් සහ සභානායකවරයෙක් වන සුනිල් ජයමිණි මහතා අද (7) අභාවප්‍රාප්ත විය.

සුනිල් ජයමිණි මහතා කොළඹ දිස්ත්‍රික්කය නියෝජනය කරමින් බස්නාහිර පළාත් සභාවේ මන්ත්‍රීවරයෙක් ලෙස පුරා වසර 26 කටයුතු කළ අතර 1993 වසරේ පැවැති පළාත් සභා මැතිවරණය ජයගනිමින් ජයමිණි මහතා මුල් වරට බස්නාහිර පළාත් සභාවට තේරී පත්විය.

ඒ මහතා 1999, 2004, 2009 සහ 2014 යන පළාත් සභා මැතිවරණවලින් ද ජය ලබා බස්නාහිර පළාත් සභාවට මන්ත්‍රීවරයෙක් ලෙස පත්වූ අතර පස්වැනි පළාත් සභාවේ සභානායක ධූරය දැරූ ජයමිණි මහතා 2002 වසරේ පළමු වරට අමාත්‍ය ධූරයකට ද පත් විය.

ජයමිණි මහතා පළාත් සභාවට පත්වීමට පෙර කැස්බෑව ප්‍රාදේශීය සභාවේ කටයුතු කළේය.

නිකවැරටිය පුදේශයේදී අභාවප්‍රාප්ත වූ සුනිල් ජයමිණි මහතාගේ දේහය පිළිබඳ අවසන් කටයුතු පසුව දැනුම් දෙන බව පවුලේ ඥාතීහූ පවසති.