2022 ජනවාරි මස 19 වන බදාදා
‘කොටකම’ නිසා එල්ටීටීඊයෙන් කොන්වූ හිටපු කොටි සාමාජිකයෙකු මේ වනවිට සිවිල් ආරක්ෂක දෙපාර්තමේන්තුවේ කිලිනොච්චි මුලතිව් ඒකාබද්ධ අණ දෙන නිලධාරිවරයාගේ සහායකයා (බඩියා) වශයෙන් කටයුතු කරයි.
එල්ටීටීඊයේ ගුවන් හමුදා බළකායේ ගබඩා භාරකරුවෙකු ලෙස වසර 10කට අධික කාලයක් කටයුතු කර ඇති ඔහු හඳුන්වන්නේ ශෂි කුමාර් වශයෙනි.
ශෂි කුමාර් පිළිබඳව කිලිනොච්චිය මුලතිව් ඒකාබද්ධ මූලස්ථානයේ අණදෙන නිලධාරී ලුතිනන් කර්නල් ඩබ්ලිව්.ඩබ්ලිව්. රත්න ප්‍රියබන්දු මහතා හෙළි කළේ මෙවැන්නකි.
මානුෂික මෙහෙයුමේදී හමුදාවට භාරවී පුනරුත්ථාපනය වී ඇති ශෂි කුමාර් මට හමුවී අවුරුදු 5ක් වෙනවා.
ඔහු එදා එල්ටීටීඊයට බැඳී ඇත්තේ කොට නිසා නිවසින් කොන්කළ නිසයි.
එල්ටීටීඊයට සම්බන්ධවීමෙන් පසුවද කොට නිසා ඔහු කොන්කර දමා තිබෙනවා.
ඒ නිසාම දැඩි හිත් අමාරුවෙන් පසුවී ඇති ඔහුට එයින් ඉවත්වීමටත් ඉඩ ලබාදී නැහැ.
අපේ දෙපාර්තමේන්තුවට සම්බන්ධ වූ පුනරුත්ථාපනය ලැබූ කොටි සාමාජිකයින් අතර එකම කොට පුද්ගලයා ලෙස සිටි ඔහු බඳවාගත් දින සිටම මගේ සහායකයා බවට පත් කර ගත්තා. දැන් ඔහුට ‘කොටා’ කියන අන්වර්ථනාමය ඉවත් වෙලා. අනික් අයගේ විශේෂ ඇගයීමට පවා ලක්වෙලා.
මට ඕනෑ කර තිබුණේ මගේ සහායකයා (බඩියා) බඳවා ගෙන ඔහුව අනිත් අයගේ විශේෂ සැලකිල්ලට භාජනය කිරීමටයි.
වැඩි කතා බහක් නැති ඔහු මට කිව්වේ විවාහකයක් වීමට අවශ්‍ය බවයි.
මම 2013 වසරේදී කොට මනාලියක් හොයලා ඔහුට බන්දලා දුන්නා. දැන් එක දරුවෙක් සිටිනවා. විශ්වමඩු ප්‍රදේශයෙන් සේවා වනිතා එක්කයේ සහාය ඇතිව නිවසක් ද හදලා දුන්නා.
දැන් උදේ සේවයට ඇවිත් හවසට යනවා. හරිම සන්තෝසෙන් ජීවත් වෙනවා.
මම කියන ඕනෑම දෙයක් කරන මගේ එකම විශ්වාසවන්තයා ඔහුයි.
එල්ටීටීඊයෙන්ද කොන්වූ ඔහුට අද අපේ දෙපාර්තමේන්තුවේ විශේෂ සැලකිල්ලක් යොමු වී තිබෙනවා.
ඔහුගේ විශ්වාසවන්තකම හා කීකරුභාවය, මගේ රාජකාරියට විශාල ශක්තියක්.
(ස්තුතිය - සිවිල් ආරක්ෂක දෙපාර්තමේන්තුවේ මාධ්‍ය අධ්‍යක්ෂ මේජර් වජිර කුමාරතුංග මහතාට)
ජයන්ත සමරකෝන්
