(යොහාන් භාසුර)

රිජ්වේ ආර්යා ළමා රෝහලේ බාහිර රෝගී අංශයේ වෛද්‍යවරු අද (19) පෙරවරු 8.00 සිට පැය 24 ක සංකේත වර්ජනයක් ආරම්භ කළ බව රජයේ වෛද්‍ය නිලධාරීන්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ මහතා පැවසීය.
එම රෝහලේ විශේෂඥ වෛද්‍යවරියකගේ අත්තනෝමතික ක්‍රියාමාර්ගවලට එරෙහිව එම වැඩ වර්ජනය ආරම්භ කළ බව කී වෛද්‍ය චමිල් විජේසිංහ මහතා අදාල විශේෂඥ වෛද්‍යවරියකගේ නොමනා සහ පිළිගත නොහැකි හැසිරීම සම්බන්ධයෙන් තියෙන ගැටලුවක් ඇති බව ද සඳහන් කළේය.
එම රෝහලේ අධ්‍යක්ෂවරයාට එම ගැටලුව විසදීමට අසමත්වීම නිසා ගැටලුව සෞඛ්‍ය සේවා අධ්‍යක්ෂ ජනරාල්වරයා වෙත යොමු කිරීමෙන් පසුව සතියක කාලයක් විසඳන බව පැවසුව ද මේ වන විට සති තුනක් ගත වී තිබුණ ද විසඳුමක් නොලැබුණු බව ද වෛද්‍ය චමිල් විජේසිංහ මහතා වැඩි දුරටත් කීය.