(නිමන්ති රණසිංහ)

රාජ්‍ය බුද්ධි සේවගේ අධ්‍යක්ෂ සුරේෂ් සලේ මහතා විසින් සිදුකරනු ලැබූ පැමිණිල්ලට අදාළව ආචාර්ය සිරිල් ගාමිණි පියතුමෝ දෙවැනි වරටත් අද (16) පැය 08කට අධික කාලයක් අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකයට පැමිණ ප්‍රකාශයක් ලබා දුන්හ.

ආචාර්ය සිරිල් ගාමිණි පියතුමන් අද (16) පෙරවරු 9.45 ට පමණ අපරාධ පරීක්ෂණ දෙපාර්තමේන්තුවට පැමිණී බවත්, පසුව සිය ප්‍රකාශය ලබාදීමෙන් පසු අද (16) සවස 6.30ට පමණ ඉන් පිටත්ව ගිය බවත් එම දෙපාර්තමේන්තුවේ ජ්‍යෙෂ්ඨ නිලධාරියක් සඳහන් කළේය.

මේ අවස්ථාවේදී සිද්ධියට අදාළව පියතුමන්ගේ ප්‍රකාශ ලබාගැනීම අවසන් වුවත්, අවශ්‍ය වුවහොත් නැවතත් ප්‍රකාශ සටහන් කර ගැනීමට පියතුමන් කැඳවීමට සිදුවනු ඇතැයි ද එම නිලධාරියා වැඩිදුරටත් පැවසීය.

මෙම සිද්ධියට අදාළව පියතුමන් ඊයේ (15) දිනයේදී ද පැය 08කට අධික කාලයක් සිය ප්‍රකාශය ලබාදී තිබිණී.

තමා අත්අඩංගුවට ගැනීමේ සූදානමක් ඇතැයි සඳහන් කරමින් එය වැලැක්වීමේ නියෝගයක් නිකුත් කරන්නැයි ඉල්ලමින් සිරිල් ගාමිණී පියතුමන් ශ්‍රේෂ්ඨාධිකරණය හමුවේ  පෙත්සමක් ගොනුකරනු ලැබුවේ ඉකුත් නොවැම්බර් 02 වෙනිදා ය.

ශ්‍රේෂ්ඨාධිකරණය විසින් එම පෙත්සම ඉකුත් 08 වෙනිදා සළකා බලනු ලැබූ අතර එහිදී අපරාධ පරීක්ෂණ දෙපාර්තමේන්තුවේ අධ්‍යක්ෂවරයා වෙනුවෙන් පෙනී සිටි නීතිපතිවරයා ශ්‍රේෂ්ඨාධිකරණයට දැනුම් දුන්නේ සිරිල් ගාමිණී පියතුමන් අත්අඩංගුවට ගැනීමේ කිසිදු සූදානමක් නොමැති බවය.

පාස්කු ඉරිදා ප්‍රහාර මාලාවට අදාළව සිරිල් ගාමිණී පියතුමන් සහ වෙනත් පාර්ශ්ව කිහිපයක් තමන් අපකීර්තියට පත්කිරීමේ අරමුණීන් කළ ප්‍රකාශ සම්බන්ධයෙන් පරීක්ෂණයක් සිදුකරන ලෙසට ඉල්ලා රාජ්‍ය බුද්ධි ප්‍රධානී සුරේෂ් සලේ මහතා අපරාධ පරික්ෂණ දෙපාර්තමේන්තුවට පැමිණීල්ලක් ඉදිරිපත් කර තිබුණේ ඉකුත් 25 වැනිදාය.