අජන්ත කුමාර අගලකඩ

අයවැයෙන් යෝජිත සියයට 25 අධිභාර බද්ද සේවක අර්ථසාධක අරමුදලෙන් සහ සේවක භාරකාර අරමුදලෙන් අය නොකරන බව මුදල් අමාත්‍ය බැසිල් රාජපක්ෂ මහතා ඊයේ (14) රාත්‍රී පැවැති කැබිනට් රැස්වීමේදී ප්‍රකාශ කර ඇත .

අයවැයෙන් සියයට 25 ක අධිභාර බද්දක් පැනවීමට තීරණය කළේ වාර්ෂිකව රුපියල් කෝටි 200 ක ට වැඩි ආදායමක් ලබන සමාගම් ,පුද්ගලයන්ගෙන් සහ හවුල් ව්‍යාපාරවලින් බව මුදල් ඇමතිවරයා ප්‍රකාශ කර ඇත .

අර්ථසාධක අරමුදල , සේවක භාරකාර අරමුදල සහ විශ්‍රාම වැටුප් අරමුදල සමාගම් බවට පත් කර ඇත්තේ පසුගිය ආණ්ඩුව සමයේ ඉදිරිපත් කළ පනතකින් බව ප්‍රකාශ කර ඇති මුදල් ඇමැතිවරයා එය නිවැරදි කරන බවද ප්‍රකාශ කර ඇත.

ඇමැතිවරයා කැබිනට් රැස්වීමේදී මේ බව ප්‍රකාශ කර ඇත්තේ, සේවක අර්ථසාධක අරමුදලින් සහ සේවක භාරකාර අරමුදලෙන් සියයට 25ක අධිභාර බද්දක් පැනවීමට ගෙන ඇති තීරණය සම්බන්ධයෙන් ඇමතිවරුන් ගණනාවක් විරෝධය පළ කිරීම සැලකිල්ලට ගනිමිනි .

අධිභාරය පැනවීමට එරෙහිව නිමල් සිරිපාල ද සිල්වා, වාසුදේව නානයක්කාර,ආචාර්ය බන්දුල ගුණවර්ධන, දිනේෂ් ගුණවර්ධන ,උදය ගම්මන්පිල,විමල් වීරවංශ , මහින්ද අමරවීර ඇතුළු ඇමැතිවරුන් කිහිප දෙනකුම කැබිනට් රැස්වීමේ දී අදහස් ප්‍රකාශ කර ඇත

මේ සම්බන්ධයෙන් අද(15) පැවැත්වෙන කැබිනට් තීරණ දැනුම් දැනුම්දීමේ මාධ්‍ය හමුවේ දී රටට පැහැදිලි කරන්නැයි ජනාධිපති ගෝඨාභය රාජපක්ෂ මහතා ඇමතිවරුන්ට දැනුම් දී ඇත .