(යොහාන් භාසුර)

වාහන අංක තහඩු ප්‍රමාද පිළිබඳව පළවූ මාධ්‍ය වාර්තාවක් පදනම් කරගනිමින් ජනාධිපති කාර්යාලය වාර්තාවක් කැඳවා ඇති බව මෝටර් රථ ප්‍රවාහන දෙපාර්තමේන්තුවේ උසස් නිලධාරියකු ‘ලංකාදීප’යට අද (18) පැවසීය.

අංක තහඩු ප්‍රමාද පිළිබඳ එම වාර්තාව ජනාධිපති කාර්යාලය වෙත අද (18) දිනයේම යොමුකිරීමට බලාපොරොත්තු වන බව කී එම උසස් නිලධාරියා එම වාර්තාවට වාහන අංක තහඩු නව ගිවිසුම පිළිබඳව ද ඇතුළත් කරන බව ද සඳහන් කළේය.

මෙම වාර්තාවට අමතරව වැඩබලන මෝටර් රථ ප්‍රවාහන කොමසාරිස් ජනරාල්වරයා සහ සියලුම සහකාර කොමසාරිස්වරුන්ගේ සහභාගිත්වයෙන් වාහන අංක තහඩු ප්‍රමාද පිළිබඳ පැය කීපයක විශේෂ සාකච්ඡාවක් අද (18) පෙරවරුවේ පැවැත්වූ බව ද වාර්තා වේ.

‘වාහන හිමි ලක්‍ෂ 5 ක් අංක තහඩුවට හිරවෙලා’ ලෙස ‘ලංකාදීප’ පුවත්පතේ අද (18) පළවූ ප්‍රධාන පුවත සම්බන්ධයෙන් මෙසේ වාර්තා කැඳවා තිබේ.