(චමිල් රූපසිංහ)

මහනුවර රෝහලට ඇතුළත් කරනු ලැබූ පාර්ලිමේන්තු මන්ත්‍රී අතුරුලියේ රතන හිමියන්ගේ සෞඛ්‍ය තත්ත්වය මේ වන විට යහපත් තත්වයේ පවතින බවත් හෙට දිනයේදී රතන හිමියන්ගේ සෞඛ්‍ය තත්වය නිරීක්ෂණය කර රෝහලෙන් නිදහස් කිරීමට හැකි බවත් මහනුවර මහ රෝහලේ අධ්‍යක්ෂ වෛද්‍ය සමන් රත්නායක මහතා පැවසීය.

ඉල්ලිම් හතරක් ඉල්ලා  දින හතරක් පුරා උපවාසයේ යෙදුණු රතන හිමියන්  මහනුවර මහ රෝහලට ඊයේ (03) ඇතුළත් කළ පසු රෝහලේ දැඩිසත්කාර ඒකකයේ වෛද්‍යවරුන් කණ්ඩායමක් විසින් ප්‍රතිකාර ලබා දුන් බවත් රතන හිමියන් දින කිහිපයක් ආහාර ගෙන නොතිබූ බැවින් විජලන තත්වයක් ඇතිවී තිබු බවත් මේ වන විට එය සජලන තත්වයට පත්වී හිමියන් යහපත් සෞඛ්‍ය තත්වයකින් පසුවන බවත් ඒ මහතා කීය.

මේ වන විට රතන හිමියන් දානය ලබා ගන්නා අතර හිමියන් මනා සෞඛ්‍ය තත්වයකින් පසුවුවත් වෛද්‍ය ප්‍රතිකාර ලබා දෙමින් වෛද්‍ය කණ්ඩායම් සිටින බවත් වෛද්‍ය සම්න් රත්නායක මහතා පැවැසීය.

එලෙසම නිරාහාරව සිටි නිසා හිමියන්ට අධික තෙහෙට්ටුවක් ඇති වී ඇති අතර ඒ සඳහාද වෛද්‍යවරුන් මේ වන විට ප්‍රතිකාර ලබාදෙන බවද රතන හිමියන් ඉතාමත් නිරෝගී තත්වයට හෙට දිනයේදි පත් වුවහොත් ප්‍රතිකාර කරනු ලබන වෛද්‍ය කණ්ඩායම් සමඟ සාකච්ඡා කර හෙට දිනයේදී රෝහලෙන් නිදහස් කිරීමට හැකිවන බවද වෛද්‍ය සමන් රත්නායක මහතා පැවැසීය.