මුදල් ඇමැති ගැන කිරිඇල්ලගෙන් දෝස් මුරයක්

(සුජිත් හේවාජුලිගේ සහ  අංජුල මහික වීරරත්න)

මුදල් ඇමැතිවරයා මැතිසබයට පැමිණ රටේ මූල්‍ය තත්වය ගැන කිසිම තොරතුරු  ලබා නොදෙන නිසා මන්ත්‍රීවරුන් විදියට රටේ  මොනවා වෙනවාදැයි අප කිසිවක් නොදන්නා බව විපක්ෂයේ ප්‍රධාන සංවිධායක ලක්ෂ්මන් කිරිඇල්ල මහතා පාර්ලිමේන්තුවේදී අද (9) පැවැසීය.

කිරිඇල්ල මහතා මෙසේ පැවසූවේ සභාවේ කටයුතු ආරම්භයේදී ප්‍රකාශයක් කරමිනි.

මුදල් බලය පවතින්නේ පාර්ලිමේන්තුවට බවත් මුදල් ඇමැතිවරයා රටේ මූල්‍ය තත්වය ගැන මේ සභාවට කරුණු ඉදිරිපත් නොකිරීම බරපතළ වරදක් බවත් ඔහු පැවසුවේය.

රටේ ආර්ථික තත්වය ගැන  දින දෙකක විවාදයක් ලබාදෙන්නැයිද ලක්ෂ්මන් කිරිඇල්ල මහතා මෙහිදී ඉල්ලීමක් කළේය.

මෙහිදී අදහස් දැක්වූ ආණ්ඩු පක්ෂයේ ප්‍රධාන සංවිධායක ජොන්ස්ටන් ප්‍රනාන්දු මහතා පැවසුවේ මුදල් අමාත්‍යවරයා අමාත්‍යාංශයේ කටයුතු හොඳින් කරගෙන යන බවයි.

ඔබ තමුන්නාන්සේලා මොනව කීවත් රට නොවැටෙන බවද ඔහු ප්‍රකාශ කළේය.

පොඩි පොඩි දේවල් අල්ලගෙන චූන් නොවී දුරදිග බලා දේශපාලනය කරන ලෙස තමා කිරිඇල්ල මහතාගෙන් ඉල්ලීමක් කරන බව පැවසූ ආණ්ඩු පක්ෂයේ ප්‍රධාන සංවිධායකවරයා මුදල් අමාත්‍යවරයා රටේ ආර්ථික තත්වය  සුභවාදී තැනකට ගැනීමට දැඩි පරිශ්‍රමයක් දරමින් කටයුතු කරගෙන යන බවද සඳහන් කළේය.

මෙහිදී අදහස් දැක්වූ නියෝජ්‍ය කතානායක රංජිත් සියඹලාපිටිය මහතා මේ සම්බන්ධයෙන් විවාදයක් පැවැත්වීම ඉදිරි පක්ෂ නායක රැස්වීමේදී සාකච්ඡා කර තීරණයකට එළැඹෙන ලෙස ඉල්ලීමක් කළේ‍ය.