(සුජිත් හේවාජුලිගේ සහ  අංජුල මහික  වීරරත්න )

තමා සභාවේ නොමැති මොහොතක උද්දික ප්‍රේමරත්න මන්ත්‍රීවරයා තමාගේ චරිතයට අපහාස වන ආකාරයෙන් කළ ප්‍රකාශය  සම්බන්ධයෙන් විභාගයක් පවත්වා අවශ්‍ය  තීරණ ගැනීමට වරප්‍රසාද පිළිබඳ කාරක සභාවට යොමු කරන්නැයි ජනමාධ්‍ය, ප්‍රවාහන හා මහාමාර්ග ඇමැති, ආචාර්ය බන්දුල ගුණවර්ධන මහතා වරප්‍රසාද ප්‍රශ්නයක් මතු කරමින් කතානායකවරයාගෙන් පාර්ලිමේන්තුවේදී  අද (07) ඉල්ලීමක් කළේය.

ප්‍රේමරත්න මහතා සිතාමතා ඕනෑකමින් ඉතා ඉහළ වෛරයෙන්, ක්‍රෝධයකින් හා ද්වේශ සහගතව අමූලික අසත්‍ය  ප්‍රචාරය කරමින්  පැවැත්වූ කතාවෙන් පාර්ලිමේන්තු ස්ථාවර නියෝග 91 උ වගන්තිය නිර්ලජ්ජිත ලෙස උල්ලංඝනය කර  ඇති බවද ගුණවර්ධන මහතා කියා සිටියේය.

ඇමැතිවරයා එහිදී  මෙසේද  පැවසීය.

මම පසුගිය රජය සමයේදී ප්‍රකට කලාකරු රිචඩ් ද සොයිසා ඝාතනය හා සම්බන්ධිත සිනමා නිර්මාණයකට උත්සාහ දැරූ නමුත් එය අතරමග නවතා දැමීමට සිදුවිය. ඊට පසු මාගේ පූර්ණ පුරාණ ශිෂ්‍යයකු සම්මානිත කලාකරුවකුවන  සරත් කොතලාවල සහ කුමාර තිරිමාදුර සිනමා අධ්‍යක්ෂණයට කැඳවා ගනිමින් ද නිව්ස් පේපර්ස්   චිත්‍රපටිය නිෂ්පාදනය කළ අතර එකී සිනමා නිර්මාණය සඳහා ඇමරිකාව එංගලන්තය ඉන්දියාව රුසියාව වැනි රටවල පැවැත්වූ අන්තර්ජාතික සිනමා උළෙලවලදී සම්මාන රැසක් දිනා ගනිමින් රටට විශාල ගෞරවයක් හා කීර්තියක් පමණක් නොව ඉතා කුඩා වුවද  ඩොලර් ත්‍යාගයක් ද උපයා ගැනීමට හැකි විය. සිනමාවට වැඩිම නාට්‍යකරුවන් පිරිසක් සිනමා අධ්‍යක්ෂකවරු වශයෙන් පත්කිරීමට අනූපමය දායකත්වයක් දැක්වූ නිරවුද අවිහිංසක ශ්‍රී ලාංකික පුරවැසියකු වන මට මෙම සභාව නියෝජනය කරන නවක මන්ත්‍රීවරයකු වන උද්දික ප්‍රේමරත්න මහතා විසින් මා පාර්ලිමේන්තුවේ රැඳී නොසිටි අවස්ථාවක සැප්තැම්බර් විසි දෙවැනි දින මෙම  සභාව අමතමින් සිතාමතා ඕනෑකමින් ඉතා ඉහළ වෛරයකින් ක්‍රෝධයකින් හා ද්වේශ සහගතව අමූලික අසත්‍ය අපහාසාත්මකව අගෞරවනීය අයුතු ආරෝපිත චෝදනා රැසක් නගමින් පැවැත්වූ කතාවෙන් පාර්ලිමේන්තු ස්ථාවර නියෝග 91 උ වගන්තිය නිර්ලජ්ජිත ලෙස උල්ලංඝනය කර  ඇති බැවින් අනාගත පාර්ලිමේන්තු මන්ත්‍රීවරුන්ට පූර්වාදර්ශයක් වන අයුරින් විභාගයක් පවත්වා අවශ්‍ය තීන්දු තීරණ ගැනීමට මෙම අපහාසාත්මක ප්‍රකාශනය පාර්ලිමේන්තුවේ වරප්‍රසාද පිළිබඳ කාරක සභාවට යොමු කිරීමට කාරුණික වන ලෙස මෙයින් ඉල්ලා සිටිනවා.