(අංජුල මහික වීරරත්න)

ගොවීන්ට පොහොර ලබාදීම සම්බන්ධයෙන් දේශීය පොහොර සමාගම් සමඟ ඇති කර ගත් ගිවිසම් අනුව ඔවුන් කටයුතු කර ඇත්ද යන්න සොයා බලා දෙසැම්බර් 31ට පෙර වාර්තාවක් කැඳවන ලෙස කෘෂිකර්ම අමාත්‍ය මහින්දානන්ද අලුත්ගමගේ මහතා කෘෂිකර්ම අමාත්‍යාංශයේ සහ රාජ්‍ය අමාත්‍යංශයේ ලේකම්වරුන්ට  දැනුම් දුන්නේය.

මහ කන්නයේදී පොහොර නිෂ්පාදනය හා බෙදාහැරීමේදී සිදුව ඇති අඩුපාඩු මඟහරවා ගෙන යල කන්නයේ සිට නියමිත පරිදි කාබනික ගොවිතැන සිදු කිරීමට සියලුදෙනා සුදානම් විය යුතු බව ද අමාත්‍යවරයා කීවේය.

කෘෂිකර්ම අමාත්‍ය මහින්දානන්ද අලුත්ගමගේ සහ කෘෂිකර්ම රාජ්‍ය අමාත්‍ය ශෂීන්ද්‍ර රාජපක්ෂ මහත්වරුන්ගේ  සහභාගීත්වයෙන් කොළඹ දී පැවැති ප්‍රගති සමාලෝචන රැස්වීමකදී අමාත්‍යවරයා මේ බව සඳහන් කළේය.

මහ කන්නයේ වගා කළ යුතු  කුඹුරු ඉඩම් ප්‍රමාණයෙන් මේ වන විට  සමස්තයක් ලෙස 90% - 95% ක පමණ කුඹුරු වගා කර ඇති බව දිස්ත්‍රික් කෘෂිකර්ම නිලධාරින් අමාත්‍ය මහින්දානන්ද අලුත්ගමගේ මහතාට මෙහිදී දැනුම් දුන් බව කෘෂිකර්ම අමාත්‍යංශය පවසයි.

එමෙන්ම ඉකුත් මහ කන්නයට සාපේක්ෂව  මෙවර වී අස්වැන්න 70% - 75% අතර ප්‍රමාණයකින් ලබා ගත හැකි බව කෘෂිකර්ම නිලධාරීන් පෙන්වා දුන් බව ද අමාත්‍යාංශය සඳහන් කරයි.