(ඩයනා උදයංගනී)
          
එළඹෙන  ඕනෑම මැතිවරණයකට මුහුණ දීම සඳහා ජනාධිපති මෛත‍්‍රීපාල සිරිසේන මහතාගේ නායකත්වයෙන් හා හිටපු ජනාධිපති මහින්ද රාජපක්‍ෂ මහතාගේ සහභාගීත්වයෙන් යුත් නව පුළුල් සන්ධානයක් ගොඩනගන බව ශ්‍රී ලංකා නිදහස් පක්‍ෂයේ මහලේකම් මහාචාර්ය රෝහණ ලක්‍ෂ්මන් පියදාස මහතා පැවසීය.


ශ්‍රී ලංකා පොදුජන පෙරමුණ ද ඒකරාශී කරගනිමින් පිහිටුවන එම සන්ධානය සමඟ අත්වැල් බැඳගන්නා ලෙස දේශපාලන පක්‍ෂ හා විවිධ සංවිධාන වෙත තමන් ආරාධනා කරන බව ද මහලේකම්වරයා සඳහන් කළේය.


මෙම සන්ධානය සඳහා සුදුසු ලකුණක් පිළිබඳව මේ දිනවල සාකච්ඡා කරමින් සිටින බව කී මහලේකම්වරයා එයට පොදු නමක් යොදාගැනීමට හා පොදු ව්‍යවස්ථාවක් සකස් කිරීමට පියවර ගන්නා බව ද කීවේය.


එමෙන්ම පාර්ලිමේන්තුව විසුරුවීමට ජනාධිපතිතුමා ගත් තීන්දුව සම්බන්ධයෙන් අධිකරණය ලබාදෙන තීන්දුව දෙස බලා සිටින බව කී මහ ලේකම් රෝහණ ලක්‍ෂ්මන් පියදාස මහතා ලැබෙන තීන්දුව අනුව ඉදිරි ක‍්‍රියාමාර්ග ගැනීමට කටයුතු කරන බව ද ප‍්‍රකාශ කළේය.


එම තීන්දුව අනුව මහ මැතිවරණයකට යා හැකිනම් එයට සූදානම් වන බව කී මහ ලේකම්වරයා මහ මැතිවරණයකට යා නොහැකි නම් බහුතර බලය හිමි ආණ්ඩු පක්‍ෂයක් ගොඩනගන බව ද කීවේය.