(අජිත්ලාල් ශානන්තඋදය සහ  ජයන්ත නානායක්කාර)

අද රට පාලනය කරන්නේ ජනතාවගේ ප‍්‍රශ්න හඳුනාගත් කණ්ඩායමක්. ඒ ප‍්‍රශ්නවලට දවසෙන්, සතියෙන්, මාසයෙන්, අවුරුද්දෙන් විසඳුම් දෙන්න බෑ. ක‍්‍රමානුකූලව ඒවාට විසඳුම් ලබාදීමට රජයට සහය දක්වන ලෙස ජනතාවගෙන් ඉල්ලා සිටින බව අගමැති මහින්ද රාජපක්‍ෂ මහතා  කොළොන්නේ දී පැවසීය.

කෝවිඞ් වසංගතය මේ රටට එන්නට පෙර වැඩකරන රටක් විදියට මේ රට තිබුණේ. මාර්ග, විදුලිය, ජලය වැනි මූලික අවශ්‍යතා නැතුව ගම දියුණු කරන්න බෑ. ඒ පහසුකම් සෑම ගමකටම එකවර දෙන්නත් බෑ. නමුත් අපි ක‍්‍රමක‍්‍රමයෙන් සෑම ගමකට ම ඒ පහසුකම් ලබාදෙමින් යනවා. ඒ වගේම විහාරස්ථාන ඇතුලූ ආගමික පරිසරයට තරුණ ප‍්‍රජාව යොමුකිරීම තුලින් තමයි යහපත් සමාජයක් ගොඩ නැගිය හැක්කේ. දහම් පාසල එහිදී විශාල වැඩකොටසක් සිදු කරනවා. යැයි ද කීවේය.

අගමැතිවරයා කතාව අවසන් කිරීමට පෙර පැමිණසිටි වැඩිහිටියෙක් කොළොන්න කපුකන්දපාර හදා දෙනවා කිව්වාට එහි වැඩ නොකෙරෙන බව උස් හඬින් කීවේය. වැඩ ආරම්භ නොකර ඇත්තේ ඇයිදැයි අගමැතිවරයා කොලොන්න ප‍්‍රාදේශීය සභාවේ සභාපතිවරයාගෙන් විමසීය.

ඔහු පැවසුවේ මුදලූත් වෙන්කර අවසන් නමුත් කොන්ත‍්‍රාත්කරුගේ ප‍්‍රමාදය වැඩ නැවතිමට හේතුව බවයි. ඒ ගැන වහාම සොයාබලා වැඩ අවසන් කරන ලෙස අගමැතිවරයා මාර්ග සංවර්ධන අධිකාරියේ නිලධාරීන්ට උපදෙස් දුන්නේය.

කොළොන්න නවනැලිය ශ‍්‍රී බෝධිරාජාරාම පුරාණ විහාස්ථානයේ ඉදිකෙරුණු චෛත්‍යයේ කොත නිරාවරණය කිරීමේ අවස්ථාවට එක්වෙමින් අගමැතිවරයා මේ බව පැවසුවේය.

විහාරාධිපති කුඹුරුගමුවේ රතනනසිරි හිමියන්ගේ ගෞරවනාම අක්තපත‍්‍ර පිරිනැමීම ද අගමැතිවරයා විසින් සිදුකරනු ලැබීය.

ඕමල්පේ සෝභිත හිමි ප‍්‍රධාන මහතා සංඝරත්නය ද, රාජ්‍ය ඇමති ජානක වක්කුඹුර මහතා ඇතුලූ දේශපාලනඥයන් ද සමග පිරිසක් එක්ව සිටියහ.