(අංජුල මහික වීරරත්න)


ජී.එස්.පී.ප්ලස් ඇඟලුම් තීරු බදු සහනය රටට අහිමි වුවහොත් ඩොලරයට සාපේක්ෂව රුපියලේ වටිනාකම රුපියල් 300කින් බාල්දු වීමට ඉඩ ඇතැයි ද මතුව ඇති අවදානම හමුවේ තවදුරටත් දේශපාලන කතා කියමින් නොසිට  ජී.එස්.පී. ප්ලස් සහනය ආරක්ෂා කිරීමට රජය වහාම කටයුතු කළ යුතුයැයි ද හිටපු අග්‍රාමාත්‍ය සහ එක්සත් ජාතික පක්ෂ නායක රනිල් වික්‍රමසිංහ මහතා පැවසීය.

ජී.එස්.පී ප්ලස් ඇඟලුම් තීරුබදු සහනය රටට අහිමි වුවහොත් රැකියා දහස් ගණනක් අහිමි වන අතර ජනතාව දරා සිටින දැඩි ආර්ථික බරට තවත් බර එකතු කර රට විනාශ කරන්න එපා යැයි ආණ්ඩුවෙන් ඉල්ලා සිටින බවද වික්‍රමසිංහ මහතා කීය.


රාජපක්ෂ යුගයේ රටට අහිමිව තිබූ ජී.එස්.පී. ප්ලස් බදු සහනය 2017 දී නැවත යුරෝපා සංගමයෙන්  ලබාගෙන මෙරට ආර්ථිකය වර්ධනය කිරීමට තම  ආණ්ඩුව කටයුතු කළ බව කී හිටපු අග්‍රාමාත්‍යවරයා  බදු අය කිරීමකින් තොරව යුරෝපයට භාණ්ඩ යැවීමට ලැබුණු අවසරය නිසා ඇගළුම් කර්මාන්තයෙ මෙන්ම ධීවර මත්ස්‍ය තහනම ඉවත් කිරීම නිසා  ධීවර කර්මාන්තයෙත් විශාල දියුණුවක් වූ බවද සඳහන් කළේය.