(නිමන්ති රණසිංහ)

බත්තරමුල්ල ඉසුරුපාය ඉදිරිපිටදී විරෝධතාවක් පවත්වා පොදු දේපල පනත ප්‍රකාරව අනර්ථයක් සිදුකළැයි කියන සිද්ධියට අදාළව අධිකරණයට ඉදිරිපත් කළ අන්තර් විශ්ව විද්‍යාල භික්ෂුබල මණ්ඩලයේ කැඳවුම්කරු ගල්වැව සිරිධම්ම හිමියන් හදුනාගැනීමේ පෙරට්ටුවක් සදහා ලබන 06 වැනිදා තෙක් රක්ෂිත බන්ධනාගාර ගත කරන ලෙස කඩුවෙල මහේස්ත්‍රාත් චාමිනී විජේබණ්ඩාර මහත්මිය අද (23) නියෝග කළාය.

ත්‍රස්වාදය වැළැක්වීමේ පනත ප්‍රකාරව මාස තුනක රැදවුම් නියෝග මත ත්‍රස්ත මර්දන කොට්ඨාසයේ රදවා තබාගැනීමෙන් පසු ඉකුත් 18 වැනිදා රක්ෂිත බන්ධනාගාර ගත කර සිටි සැකකාර හිමිනම නිතිපතිවරයාගේ උපදෙස් මත අද (23) ඇප මත මුදා හැරිමෙන් පසු මෙම සිද්ධියට කඩුවෙල අධිකරණයට ඉදිරිපත් කළ අවස්ථාවේදී මහේස්ත්‍රාත්වරිය මෙම නියෝගය නිකුත් කළාය.

බත්තරමුල්ල ඉසුරුපාය අධ්‍යාපන අමාත්‍යාංශ කාර්යාලය ඉදිරිපිටදී ඉකුත් ජුනි මස 10 වැනිදා විරෝධතා ව්‍යාපාරයක් සිදුකරමින් එම කාර්යාලයේ ප්‍රධාන ගේට්ටුවට රුපියල් දෙලක්ෂ තිස් දහසක අනර්ථයක් සිදුකර පොදු දේපල පනත ප්‍රකාරව වරදක් සිදුකළැයි තලංගම පොලීසිය මෙම සිද්ධිය සම්බන්ධයෙන් අධිකරණයට කරුණු වාර්තා කර තිබිණී.

ඒ අනුව මෙම සැකකාර හිමිනම පොදු දේපල පනත ප්‍රකාරව මෙන්ම අයුතු ජන රාශියක සාමාජිකයකු වෙමින් කටයුතු කර පොලිස් නිලධාරින්ගේ රාජකාරිය බාධා කළැයි චෝදනා 15ක් යටතේ පොලීසිය අධිකරණයට කරුණු වාර්තා කර ඇත.