( තිළිණි ද සිල්වා )

ශ්‍රී ලංකාව තීරණාත්මක ආර්ථික අභියෝගයකට මුහුණ දෙමින් සිටින බැවින් චීනයේ සහය අඛණ්ඩව ලබා දෙන බව චීන රජය සඳහන් කළ බව එරට ශ්‍රී ලංකා තානාපති ආචාර්ය පාලිත කොහොන මහතා පැවසීය.

චීනයේ ශ්‍රී ලංකා තානාපති ආචාර්ය පාලිත කොහොන මහතා ,චීනයේ විදේශ කටයුතු උප අමාත්‍ය ලූවෝ ජාවෝහුයි මහතා හමු වූ අවස්ථාවේ මේ බව සඳහන් කර තිබේ.

විශේෂයෙන්ම ජිනීවා හි එක්සත්  ජාතීන්ගේ මානව හිමිකම් කවුන්සිලයේ දී  ශ්‍රී ලංකාවට චීනයේ සහය ලබා දෙන බවද  උප අමාත්‍ය ලුවෝ මහතා මෙහිදී සහතික වී තිබේ.

දෙපාර්ශවය අතර පැවති මෙම දීර්ඝ සාකච්ඡාවට ජාත්‍යන්තර සංසදවල දී සහයෝගීතාව සහ අන්‍යෝන්‍ය සහය, කොවිඩ්-19 වසංගතයෙන් පසු ප්‍රකෘතිමත් වීම හා සම්බන්ධ ආර්ථික කරුණු, කොවිඩ්-19 වසංගතය ඵලදායී ලෙස කළමනාකරණය කිරීම සහ අනාගත ඉහළ මට්ටමේ සංචාර පිළිබදව ද  සාකච්ඡාව බඳුන් වූ බව චීනයේ ශ්‍රී ලංකා තානාපති කාර්යාලය කියා සිටී.

ශ්‍රී ලංකාව වෙත චීන සංචාරකයන්ගේ පැමිණීම ඉහළ නැංවීම සඳහා සහ රජය සතු ව්‍යවසාය ඇතුළුව වැඩි ව්‍යාපාර සංඛ්‍යාවක් කොළඹ වරාය නගරයේ සහ හම්බන්තොට කර්මාන්ත කලාපයේ ආයෝජනය කරවීම සඳහා දරන ප්‍රයත්නවලට චීන විදේශ කටයුතු අමාත්‍යාංශය කාර්යශීලී ලෙස සහය දක්වන බවද ශ්‍රී ලංකා තානාපති කාර්යාලය කියා සිටී.

චීනයේ ආධාර ලද මෙම ව්‍යාපෘති දෙක බිම් මට්ටමෙන් ඉහළ නැංවීම සඳහා සුදුසු කාලය එළඹ ඇති බව ලුවෝ මහතා පිළිගත්තේය. දෙරට අතර ද්විපාර්ශ්වික නිදහස් වෙළඳ ගිවිසුමට කඩිනමින් එළඹීමේ අරමුණින් යුතුව ඒ පිළිබඳ සාකච්ඡා නැවත ආරම්භ කිරීම, ශ්‍රී ලංකාවට වාසිදායක වනු ඇති බවට දෙපාර්ශ්වයම එකඟ විය. 

මෙහිදී ආචාර්ය කොහොන මහතා, ශ්‍රී ලංකාවේ ස්වාභාවික, කෘෂිකාර්මික හා කාර්මික නිෂ්පාදන රැසකට චීනයේ ලාභදායී වෙළඳපොළ වෙත පිවිසීම සඳහා බාධා පමුණුවන තීරුබදු නොවන බාධක පිළිබඳ ගැටළුව ද මතු කළේය.