එක ගොවියෙක් වත් වී ගොවිතැනෙන් ඉවත් වී නැහැ

(අංජුල මහික වීරරත්න)

ගොවි ජනතාව වී වගාවෙන් ඉවත් වෙමින් සිටින බවට ඇතැම් පුද්ගලයින් හා පුද්ගල කණ්ඩායම්  කරන ප්‍රකාශ සම්බන්ධයෙන් නිවැරදි තොරතුරු ඇතුළත් වාර්තාවක්  වහාම ලබා දෙන ලෙස කෘෂිකර්ම වනජීවී හා වන සම්පත් සංරක්ෂණ අමාත්‍ය මහින්ද අමරවීර මහතා ගොවිජන සංවර්ධන දෙපාර්තමේන්තුවට උපදෙස් දුන්නේය.

ඒ අනුව 2019 යල කන්නයේ සිට 2022 යල කන්නය දක්වා කාලයේ  වී වගා කළ කිසිදු ගොවියෙක් වී වගාවෙන් ඉවත් වී නොමැති බව ගොවිජන සංවර්ධන දෙපාර්තමේන්තුව කෘෂිකර්ම අමාත්‍යවරයාට දැනුම් දුන්නේය.

2019 යල කන්නයේ මෙරට හෙක්ටෙයාර්  308,028ක වී වගා කර ඇති අතර ගොවීන් සංඛ්‍යාව 470,286කි.

2019-2020 මහ කන්නයේ මෙරට හෙක්ටෙයාර් 673,928ක් වී වගා කර තිබු අතර  ගොවීන් ප්‍රමාණය 901,295කි.

2020 යල කන්නයේ දී හෙක්ටෙයාර් 513,755ක් වගා කර ඇති අතර ගොවීන් ප්‍රමාණය 840,487කි.

2020- 21 මහ කන්නයෙ තුළ හෙක්ටෙයාර් 777,915ක් වගා කර තිබෙන අතර ගොවීන්  11,52,503ක් වී වගාවෙහි නිරතව තිබේ.

එමෙන්ම 2021 යල කන්නයේ දී හෙක්ටෙයාර් 526,698ක වී වගා කර තිබිනි. ඒ සඳහා නිරත වූ ගොවීන් ප්‍රමාණය 833,892කි.

මේ වසරේ ආසන්නතම කන්නය වන  2022 යල කන්නයේ හෙක්ටෙයාර් 512,000ක වී වගා කර තිබු අතර රජය යුරියා පොහොර ලබා දීම ආරම්භ කළ පසු පමණක් ගොවීන් 490,515ක් වී වගාවේ නිරතව සිටි අතර ඔවුන් විසින් වගා කළ කුඹුරු හෙක්ටෙයාර් ප්‍රමාණය 304,734ක් බවත් කෘෂිකර්ම අමාත්‍යාංශය පවසයි .