(දයාරත්න ඇඹෝගම)

වනඅලියන් ගම් වැදිම පාලනය කිරිමට හා විදුලි වැට ආරක්ෂා කිරිමේ අරමුණින් උතුරු මැද  අලි තර්ජනය පවතින ගම්මාන රැසක රැපියල් ලක්ෂ 350 කට අධික මුදලක් වැය කොට ඉදිකළ ආරක්ෂක මුරකුටි 81ක් කිසිදු ඵල ප්‍රයෝජනයකට නොගෙන වසරකට අධික කාලයක් තිස්සේ වල්බිහිවි විනාශයට පත්වන බව ශ්‍රී ලංකා පොදුජන එක්සත් පෙරමුණේ බටහිර ආසන සංවිධායක කේ.විජේවීර මහතා පවසයි.

අලි තර්ජනය පවතින ගම්මානවල පදිංචි කරුවන්ගේ ජීවිත,දේපල, බව භෝග ආරක්ෂාකර ගැනිම හා විදුලිවැට ආරක්ෂා කර ගැනිමේ අරමුණින් මෙම මුරකුටි ඉදිකිරිමේ වැඩ සටහන පසුගිය 2024 වසරේදි පළාත් ආණ්ඩුකාර කාර්යාලයේ මැදිහත් විමෙන් ආරම්භ කොට තිබුණි.

මෙම මුරකුටි සදහා වනජීවි නිලධාරින්ගේ අධික්ෂණය යටතේ සිවිල් ආරක්ෂක භටයන් හෝ සිවිල් කමිටු නියෝජිතයන් යෙදවිමට සැළසුම් කර තිබුණි.

වනඅලියන් ගම්වැදිම පාලනය කිරිමට හෝ විදුලිවැට ආරක්ෂා කිරිම සදහා ඉදිකරන ලද මුරකුටි සදහා ආරක්ෂකයන් කිසිවකු වසරකට අධික කාලයක් ගතව ගියත් මේ දක්වා යොදා නොමැති බවත් ගම්වාසිහු පවසති.

මහජන මුදල් රුපියල් ලක්ෂ ගණනාවක් වියදම් කළද පෙර මෙන්ම තවදුරටත් වන අලියන් සිය ගම්මානවලට කඩාවැදි ජීවිත හානි සිදුකරමින් තමන්ගේ දේපලත්,භව භෝගත් විනාශ කරන බවත් ඔවුහු චෝදනා කරති.