(තිළිණි ද සිල්වා   සහ  රංජන් කටුගම්පොළ)

හිටපු නාවික හමුදාපති වසන්ත කරන්නාගොඩ මහතාට එරෙහිව කොළඹ ත්‍රිපුද්ගල මහාධිකරණය හමුවේ ගොනු කර තිබූ අධි චෝදනා ඉල්ලා අස් කර ගැනීමට නීතිපතිවරයා ගත් තීරණය බලශූන්‍ය කරන රිට් ආඥාවක් නිකුත් කරන ලෙස ඉල්ලා අතුරුදන්වූ එම ළමයින්ගේ මව්පියෝ හතර  දෙනෙක් අභියාචනාධිකරණය හමුවේ අද රිට් පෙත්සමක් ගොනු කළහ.

සරෝජනී පෙරේරා , ජෙනිෆර් වීරසිංහ , මර්වින් ප්‍රේමලාල් ,ජෙෆ්රියාස් සබ්රීන් යන මහත්ම මහත්මීන් ගොනු කර තිබෙන මෙම පෙත්සමේ වගඋත්තරකරුවන් ලෙස නීතිපති සහ හිටපු නාවික හමුදාපති වසන්ත කරන්නාගොඩ මහතා නම් කරනු ලැබ සිටියි.

වගඋත්තරකරුවන්ට නොතීසි නිකුත් කරන ලෙසද , දෙවැනි වගඋත්තරකාර හිටපු නාවික හමුදාපති වසන්ත කරන්නාගොඩ මහතාට එරෙහි අධි චෝදනා ඉල්ලා අස් කර ගැනීමට නීතිපති ගෙන ඇති තීරණය බලශූන්‍ය කරන රිට් ආඥාවක් නිකුත් කරන ලෙසද , එම තීරණය ක්‍රියාත්මක කිරීම වළකාලන අතුරු නියෝගයක් නිකුත් කරන ලෙසද පෙත්සම්කරුවෝ සිය පෙත්සමින් ඉල්ලා සිටිති.