(යොහාන් භාසුර)

ආනයනික කිරිපිටි මිල රුපියල් 125 කින් ඉහළ දැමූ බව කිරිපිටි ආනයනකරුවන්ගේ සංගමය අද (20) පැවසීය.

ඒ අනුව කිලෝග්‍රෑම් එකක කිරිපිටි පැකට්ටුවක මිල රුපියල් 125 කින් සහ ග්‍රෑම් 400 ක කිරිපිටි පැකට්ටුවක මිල රුපියල් 50 කින් ඉහළ දැමූ බවත් නව මිල අද (20) දින සිට ඇසුරුම් කරන කිරිපිටි පැකට්ටුවලට සිට ක්‍රියාත්මක බවත් කිරිපිටි ආනයනකරුවන්ගේ සංගමයේ සාමාජිකයකු කීය.

කිලෝග්‍රෑම් එකක කිරිපිටි පැකට්ටුවක නව මිල රුපියල් 3,000 ක් ද, ග්‍රෑම් 400 ක කිරිපිටි පැකට්ටුවක නව මිල රුපියල් 1,200 ක් ද, බව පත්වන බව කී එම සාමාජිකයා ඇතැම් සමාගම් මෙම මිලට වඩා රුපියල් 100 ක පමණ අඩු මිලකට අළෙවිකරන අවස්ථා ද ඇති බව ද සඳහන් කළේය.

විනිමය අනුපාතවල ඉහළ යෑම සහ වෙළෙඳපොළ තත්වය පිළිබඳව අවදානය යොමුකර මෙම මිල ඉහළ දැමීමේ තීරණය ගත් බවත් කිරිපිටි නව මිලට වෙළෙඳපොළට අඛණ්ඩව නිකුත් කරන බවත් කිරිපිටි ආනයනකරුවන්ගේ සංගමයේ සාමාජිකයා වැඩි දුරටත් පැවසීය.