(බිඟුන් මේනක ගමගේ )

දරුකමට හදාවඩාගැනීම සඳහා විදේශිකයන්ට දරුවන් දුන් මව්වරුන්ට සිය දරුවන් සොයාගැනීම සඳහා නෙදර්ලන්ත රජයේ අනුග්‍රහයෙන් ඩී.එන්.ඒ දත්ත බැංකුවක් පිහිටුවීමට කටයුතු කරන්නේ යැයි ‘දරුවන් සොයන ශ්‍රී ලංකා මවුවරු’ සංවිධානය පවසයි.

එසේ සිය දරුවන් සොයමින් සිටින මවුපියවරුන් තම සංවිධානයට තොරතුරු ලබාදෙන්නේ නම් එම දරුවන් දැන් වාසය කරන රටවල් සමඟ සන්නිවේදන කටයුතු කර ඔවුන් එකිනෙකාට මුණගැස්සවීමට කටයුතු කළ හැකි යැයි එම සංවිධානයේ නියෝජිතවරියක වන ෆන් රොසන් මෙනෙවිය ‘ලංකාදීප’ යට පැවැසීය.

සැබැු මවුපියවරුන් සෙවීමට ඇති එකම මග ඩී.එන්.ඒ තාක්ෂණය පමණකැයි කී ඇය ඒ සඳහා විශාල මුදලක් වැය වන බැවින් විදේශ රාජ්‍ය අනුග්‍රහය ලබාගත හැකි වැඩපිළිවෙලක් මගින් මෙම කටයුත්ත වඩා පහසු වන්නේ යැයි කීය.

sri lanka mothers searching for their children යන නමින් අන්තර්ජාලය විමසීමෙන් හෝ  +31 64 3525 451 දුරකථන අංකයට ෆන් රොසන් ඇමැතීමෙන් මේ සම්බන්ධයෙන් වැඩි විස්තර දැනගත හැකි බව එම සංවිධානය පවසයි.

1980 දශකයේදී දරුකමට හදාගැනීම සඳහා වංචනික තොරතුරු ඉදිරිපත් කරමින් මෙරටින්දරුවන් දහස් ගණනක් විදේශයන්ට අළෙවි කර ඇතැයි නෙදර්ලන්ත වාර්තා චිත්‍රපටියකින් පසුගිය වසරේ අනාවරණය කෙරුණු අතර එම දරුවන්ගේ මවුපියන් හඳුනාගැනීම සඳහා ඩී.එන්.ඒ දත්ත ගබඩාවක් සකස් කරන්නේ යැයි සෞඛ්‍ය ඇමැති රාජිත සේනාරත්න මහතා ද පවසා තිබිණි.