( තිළිණි ද සිල්වා )
 
එක්සත් ජාතීන්ගේ මානව හිමිකම් කවුන්සිලයේ 37 වන සැසිවාරයට සහභාගීවිම සඳහා ශ්‍රී ලංකා රජයේ නියෝජිත පිරිස අද (19) දිවයිනෙන් පිටත්ව ගියේය
 
ඒ අනුව විදේශ කටයුතු අමාත්‍ය තිලක් මාරපන මහතා , විශේෂ කාර්යය භාර අමාත්‍ය ආචාර්ය සරත් අමුණුගම මහතා  සහ පළාත් පාලන අමාත්‍ය.ෆයිසර් මුස්තාෆා  ඇතුළු කණ්ඩායමක් ජිනීවා බලා පිටත්ව යන බව විදේශ කටයුතු අමාත්‍යංශය නිවේදනය කළේය.
 
මීට අමතරව විදේශ කටයුතු අමාත්‍යාංශයේ සහ නීතිපති දෙපාර්තමේන්තුව නියෝජනය කරමින් නිලධාරීන් මණ්ඩලයක්ද සහභාගී වුහ.
 
එක්සත් ජාතීන්ගේ මානව හිමිකම් කවුන්සිලයේ 37 වන සැසිවාරය පසුගිය පෙබරවාරි මස 26 වනදා ආරම්භ වූ අතර එය මාර්තු මස 23 වනදා දක්වා පැවැත්වේ.
 
ඒ අනුව එළඹෙන 21 වැනිදා  ශ්‍රී ලංකාව සම්බන්ධයෙන් එක්සත් ජාතීන්ගේ මානව හිමිකම් මහ කොමසාරිස් සෙයිද් රාද් අල් හුසේන් කුමරු ඔහුගේ වාර්තාව ඉදිරිපත් කිරිමට නියමිතය.
 
මෙම වාර්තාවට ප්‍රථම වාර්තාවක් ඉදිරිපත් කරමින් මානව හිමිකම් කොමිසාරිස්වරයා පවසා සිටියේ මෙරට වගවීමේ ක්‍රියාවලිය තවදුරටත් ශක්තිමක් කළ යුතු බවයි.
 
කෙසේවෙතත් මහ කොමසාරිස්වරයාගේ වාර්තාව සම්බන්ධයෙන් විදේශ කටයුතු අමාත්‍යවරයා අදහස්  දැක්වීමට නියමිතව තිබේ.
 
මේ අතර මෙරට විශ්ව කාලාන්තර සමාලෝචනය පිළිබඳ වාර්තාව අද දිනයේ සම්මත කර ගැනිමට නියමිත බව විදේශ කටයුතු අමාත්‍යංශය සඳහන් කළේය.
 
සෑම වසර 05කට වරක්ම එක්සත් ජාතීන්ගේ සංවිධානයේ සාමාජික රටවල් 193හිම මානව හිමිකම් තත්ත්වය කාලාන්තර වශයෙන් සාමාලෝචනය කරන ක්‍රියාවලිය විශ්ව කාලාන්තර සාමාලෝචනය ලෙස හදුන්වනු ලබයි.
 
2007 වසරේදී මෙම විශ්ව කාලාන්තර සාමාලෝචනය හදුන්වාදී ඇති අතර මේ දක්වා පූර්ණ සාමාලෝචන වට දෙකක් පවත්වා තිබේ.