(කාංචන කුමාර ආරියදාස)

ඓතිහාසික සීගිරිය පිදුරංගල රජ මහා විහාරස්ථ පිදුරංගල  ගල මත සිට තරුණ තරුණියන් පිරිසක්  අඩ නිරුවත්ව  ලබා ගත්  බව කියන ඡායාරූප කිහිපයක්  මේ වන විට සමාජජාල මාධ්‍ය හරහා ප්‍රචාරය වෙමින් පවති.


ඉතාමත් අශෝභන ලෙස ඓතිහාසික පිදුරංගල ගලට නැඟ සීගිරි පව්ව පෙනෙන ආකාරයෙන් සීගිරියට මෙන්ම පිදුරංගල රජමහා විහාරයටද අපහාස වන ආකාරයෙන් එම ඡායාරූප ලබා ගෙන තිබේ.


සීගිරි පව්ව සහ පිදුරංගල කිලෝමිටර කිහිපයකින් ඈත් ව පවතින ස්ථාන දෙකකි. සීගිරිය එකල මහ රහතුන් වහන්සේලා වැඩ සිට   සීගිරි බලකොටුවක් වන කාල සමයේ එහි   වැඩ සිටි රහතුන් වහන්සේලා පිදුරංගල  නමින් රහතුන් වහන්සේලාට  වැඩ සිටීමට ආරාම සකසා පූජා කළ ඓතිහාසික ස්ථානයක් බව පුරාවිද්‍යා ඉතිහාසඥයෝ පවසති.


පිදුරංගල  රජ මහා විහාරාධිපති ආචාර්ය දානියගම ආනන්ද නාහිමියන් කියා සිටියේ ඉතාමත් අශෝභන ආකාරයෙන් මේ ස්ථානයේ පුද්ගලයන් ඡායාරූප ලබාගෙන මුහුණු පොතට එක් කර සිටීම පිළිබඳව වහාම පරීක්ෂණයක් ආරම්භ කර මෙම පිරිස නීතියේ රැහැනට හසුකර ගත යුතු බවය. 


පූජනීය ස්ථානයක් ලෝක පූජිත ස්ථානයක මේ ආකාරයෙන් හැසිරීම පිළිබඳව මීට වඩා වගකීමෙන් යුතුව නරඹන පිරිස් හැසිරිය යුතු බවද උන්වහන්සේ අවධාරණය කරති.


සීගිරිය පුරාවිද්‍යා නිලධාරීන් ගෙන් මේ පිළිබඳව විමසීමට උත්සහ කළ ද  පුරාවිද්‍යා කාර්යාලයේ නිලධාරියකු කියා සිටියේ මෙම ස්ථානයේ  පුරාවිද්‍යා නිලධාරියෙකු සේවයේ නොමැතිවීම  නිසා ඔවුන් මේ ආකාරයෙන් හැසිරෙන්නට ඇති බවය .


කෙසේවෙතත් මේ පිළිබඳව සොයා බලා ඉහළ නිලධාරීන්ට දැනුම් දීමට අවශ්‍ය පියවර ගන්නා බව ඔහු  සඳහන් කළේය. 


සීගිරිය නැරඹීම සඳහා පැමිණෙන දෙස් විදෙස් සංචාරකයෝ  විශාල වශයෙන් ආසන්නයේ පිහිටි පිදුරංගල ගල හා ඓතිහාසික පිදුරංගල රජමහා විහාරය  නැරඹීම සඳහා ගමන් කරති.


සමාජ ජාලා වෙබ් අඩවි හරහා මෙවැනි අශෝභන ක්‍රියා ප්‍රචාරය කිරීම තුළින් බෞද්ධ සිද්ධස්ථානයකට මෙන්ම ලෝක පූජිත සීගිරියටද අගෞරවයක් සිදු වන බව ප්‍රදේශවාසීහු පවසති.