(කලවාන උපේන්ද්‍ර ප්‍රියංකර ජාතුංගම)
ත්‍රිරෝද රථයට ගොඩවූ මහත්මා ගමනාන්තයේ නොසිටීමෙන් අන්දුන්කුන්දුන් වූ ත්‍රිරෝද රථ රියැදුරකු පිළිබඳ පුවතක් වාර්තා වෙයි.

සිද්ධිය මෙසේය.

නගරයේ බස් නැවතුමක් අසල ත්‍රිරෝද රථ ගාලකි. හවස් වරුවේ බොහෝ විට ත්‍රිරෝද රථ වෙත මගීන් පැමිණෙන්නේ මග හැරුණු බස් රථ හඹාගොස් අල්ලා ගැනීමටය. සිදුවීම වූ දිනයේද රථගාලට පැමිණි තරුණයකු වයසක ත්‍රිරෝද රථ රියැදුරෙකුට තමන්ට මීට මොහොතකට පෙර පිටත්වූ බස් රථය අල්ලා ගැනීමට අවශ්‍ය බව පවසා ඇත. එසේ පවසා පොඞ්ඩක් ඉන්න අන්කල් මම ෆෝන් කාඞ් එකක් අරන් එන්නම් යැයි ත්‍රිරෝද රථ රියදුරාට කියා විගසින් අසල තිබූ කඩයකට දිවගොස් ඇත. තරුණයා කියූ දේ ත්‍රිරෝද රථ රියදුරාට ඉක්මන් කරන්න යැයිද මගියා ත්‍රිරෝද රථයට ගොඩවුණා දැයි සිතා බස් රථය හඹා යාම ආරම්භ කර තිබේ.

කාඞ් පත රැගෙන හනික පැමිණි තරුණයා ත්‍රිරෝද රථය නොමැති බව දැක වෙනත් ත්‍රිරෝද රථයකින් ගොස් බස් රථය අල්ලා ගෙන ඇත. වයසක ත්‍රිරෝද රථ රියැදුරු කිලෝමීටර් ගණනක් ගොස් බස් රථය අල්ලාගෙන ආ බහින්න මහත්තයා යැයි කියා පසුපස බලද්දී ත්‍රිරෝද රියේ තරුණයා නොදැක අන්දුන්කුන්දුන් වී ඇත. පසුව ත්‍රිරෝද රථ ගාලට හිස් අතින් පැමිණ තම සගයන් හා පවසා ඇත්තේ මාර වැඬේනේ හයර් එක ගිය කෙනා මගදි අතුරුදන් වෙලානේ යැයි කියාය.