දේව වරමක් ලදැයි කියමින් දෙවියන්  යදින කාන්තාවක අසල්වැසි නිවසක කාන්තාවකට ‘‘දේව දරුවා’’ කියා හඬ තලමින් කතා කරද්දී තම නිවසේ දේව දරුවන් නැති බවත් ඉන්නේ තම සැමියාගේ දරුවන් බවත් පැවසීමෙන් වරම්කාරියගේ වරම එකවරම ඇණහිටීමේ පුවතක් හඳපාන්ගොඩ ප්‍රදේශයෙන් අසන්නට ලැබුණේ මෙසේය.
ඉංගිරිය ප්‍රදේශයේ නිවසක කාන්තාවකට හිටි අඩියේ වරමක් ලදැයි කියා දෙවියන්ගෙන් ලද වරමින් පහන් තියා පරළ වෙමින් සාස්තර කියනවා යැයි ප්‍රසිද්ධ වීමට උත්සාහ ගනිමින් සිටින අවස්ථාවකි.
ඇය උදේ සවස කහ පැහැති වස්ත්‍ර ඇඳපැළඳ පත්තිනි දෙවියන් දුන් වරමක් යයි කියමින් යන එන අයටත් දන්නා කියන අයටත් කියන්නේ මහත් උජාරුවෙනි. මේ අය අතර සමහරෙක් ඇය කියන දේ වැළඳ ගත්තද සමහරෙක් දෙවියන් කොහෙද මිනිසුන් තුළ යයි කියමින් ඇගේ සිත නොපෑරෙන්න අසා සිටියත් නොපිළි ගත්තේ සැබෑ තතු දන්නා හෙයිනි.
ඇයගේ නිවසට මායිම්ව අනෙක් නිවස පිහිටා තිබේ. එම නිවස අසල විශාල අඹ ගසක්ද ඇත. එම නිවසේ බිරිඳ දරුවන් පාසලට යවා ගෙමිදුල ඇමදීම පුරුද්දක් කරගෙන තිබුණි. උදේ අට නවය වනවිට දේව වරම ලද කාන්තාව මුහුණකට සෝදා පේවී මල්පහන් පුදා දෙවියන් යදිමින් පරළවන අවස්ථාවය.

එම කාන්තාවගේ නිවස ආසන්නයේ පිහිටි නිවසේ කාන්තාව මිදුල අතුගා එක්රැස් කර ගත් කුණු ටික බෑගයක ආධාරයෙන් රැගෙන ගොස් අඹ ගස මුලට දමා නිවස පිටුපසට වී  මුහුණ අතපය සෝදමින්  සිටියදී, දේව දරුවා දේව දරුවා දේව දරුවා, කියමින් දේව වරම ලද කාන්තාව පරළවෙමින් තමන්ගේ  නිවස අසල වැට මායිමට පැමිණ හඬතලන හඬ ඇසී දත් මදිමින් සිටි කාන්තාව කඩි මුඩියේ කට සෝදා දේව වරම ලද කාන්තාව ඉදිරියට ගියේ මොකක්ද මේ නටන නාඩගමයැයි සිතට ආ සිතුවිල්ල ඇතිවය.
එම කාන්තාව දුටු දේව වරම ලද කාන්තාව පරළවීම දෙගුණ තෙගුණවී, දේව දරුවා දේව දරුවා, දේව දරුවා, යයි කාන්තාව දෙසට අතක් දිගු කරමින් යමක් කියන්නට පටන් ගන්නවාත් සමගම, අනේ ….මේ…....... මෙහේ ඇති දේව දරුවෙක් නෑ..... මෙහෙ ඉන්නෙ සිරිපාලගේ.... දරුවො  විතරයි. උන් දෙන්නත් මේ වෙලාවෙ ගෙදර නෑ ඉස්කෝලෙ ගියා. එක පාරටම වරම ඇණ හිටියේය. කියහංකො බලන්න උඹේ ඔය සාස්තරේ දැන්. නන්දාගේ පරළය අමතකය.
‘‘ආ....මේ...... අඹ...... ගස් …. පත්තිනි මෑණියන්ට අයත් ඒව. අඹ ගස් යට කුණු කසළ දමන්න එපා’’
‘‘අනේ මේ ඔය ඉන්න දෙවියන්ට කියපං මේ මම අවුස්සා ගන්නේ නැතුව පාඩුවේ ඉන්න කියලා.’’
මේ පුවත ගමේ ගොඩේ ආරංචි වූයේ අසල්වැසියන් අසා සිටි නිසාය. එදා සිට එම කාන්තාවට ‘‘අඹ දෙයියෝ” යයි ඇමතීමට කොල්ලො කුරුට්ටෝ පමණක් නොව වැඩිහිටියෝද පුරුද්දක් කර ගත්හ.

හංවැල්ල එච්.එස්.ඒ. නන්දන