(මොරගොල්ලාගම සිසිර කැලේගම)
මත්වතුර තොල ගෑමේ පාටියකට සහභාගිවීම සඳහා බිරිඳගෙන් ගැලවෙන්නට සැමියා දුන් උපදෙස් අනුව කටයුතු කරන්නට පැමිණි මිතුරන් දෙදෙනකු කටයුතු කළ ආකාරය නිසා සැමියාගේ සාක්කුවට තට්ටුවීමේ පුවතක් පොල්පිතිගම නගරයෙන් වාර්තා වේ.


සිද්ධිය මෙසේය.


කලකට පසුව මිතුරන් තිදෙනකු අහම්බෙන් හමුවී ඇත ඔවුන්  එලෙස හමුවීමෙන් පසු මත්පැන් පානය කිරීමට සැලසුම් කළ යෝජනාවට තිදෙනාම කැමැත්ත පළකර තිබේ.


එහිදී මිතුරන් දෙදෙනකුට ඒ අවස්ථාවේ අතේ මුදල් නොමැති ගැටලුව පැන නැගී ඇත.


පසුව අනෙක් මිතුරා මුදල් දී එය රැගෙන තම නිවසට පැමිණෙන ලෙසත් වෙනත් කටයුත්තක් සඳහා පැමිණි බව බිරිඳට අඟවන ලෙසත් දන්වා ඔහු තම සගයින් දෙදෙනා එන්නට පළමු නිවස කරා ගොස් ඇත.


ඒ අනුව මිතුරන් දෙදෙනා ඔහු දුන් මුදලට අරක්කු බෝතලයක් හා අවැසි කටගැස්මත් රැගෙන එම නිවසට පැමිණයහ. එලෙස මිතුරන් දෙදෙනා නිවසට යන විට ගෙහිමියා තම බිරිඳ හා දරුවන් සමග නිවසේ සිටියහ.


මිතුරන් දෙදෙනා කතා කළ අවස්ථාවේ දී දොර විවෘත කර ඇත්තේ එහි සිටි බිරිඳ විසිනි.


පැමිණි කාරණය කුමක්ද කියා ඇසූ ඇය තම සැමියා නිදි බව පැවසුවාය.


එය ඇසුණු සැමියා ‘‘මොකාද යකෝ මේ රෑ පානේ නිදා ගන්නවත් දෙන්නේ නැත්තෙ’’ කියා කිසිවක් නොදන්නා සේ බිරිඳට දැනෙන්නට මෙන් පැමිණි කාරණය විමසා තිබේ.


‘‘අපි ආවේ අරක්කු බෝතලයක් බොන්න’’ කියා මිතුරන් දෙදෙනා බිරිඳටත් ඇසෙන්නටම එහිදී පවසා තිබේ
‘මේ රෑ වෙලා මෙහේ අරක්කු බොන්ඩ දෙන්න බැහැ. මගෙ නෝනාත් දරුවොත් ඉන්නවායි’. ඔහු බිරිඳට ඇසෙන්නට පවසා තිබේ.


‘‘ඒක තමා අපි ආවාට සමාවෙන්න. අපි වෙන තැනකට යන්නම්’’ කියා ඔවුන් නික්ම යනවාත් සමගින් බිරිඳ දොර වසා දැමුවාය.


මිතුරන් දෙදෙනා පදමට මත්පැන් පාටිය සමරා ඇති අතර මුදල් වැය කළ ගෙහිමියා බිරිඳගෙන් බේරී යාමට නොහැකිව දැඩි කෝපයෙන් යුතුව හිස් බඩම කෑම කා නින්දට වැටී ඇත.


පසුදින සගයන් දෙදෙනා සොයා ගිය මිතුරා ‘‘නිකං ආවා කියා ගෙට ගොඩවෙලා බිරිඳ ගෙට ගියාට පස්සේ ඕක චුට්ට චුට්ට බොන්න තිබුණානේ. අවසානයේ ඔය කරපු වැඩෙන් මගේ සල්ලිත් නැහැ. මට බොන්නත් නැහැ’’ කියා සගයින් දෙදෙනාට නෝක්කාඩු කියා අමනාපයෙන් මෙන් නික්ම ගියා ලු.