පොල්ගස්ඕවිට එස්. වික්‍රමආරච්චි

මත්පැන් පානයටත් මස් අනුභවයටත් ඇබ්බැහි වී සිටින  ස්වාමිපුරුෂයාට  මස් වෙනුවට කොස් වහලු‍ තම්බා කවන ලද පුවතක් දකුණේ කඳුකර ගම් ප්‍රදේශයකින් අසන්නට ලැබිණි.

ඔහු ජීවනෝපාය වශයෙන් නීති  විරෝධීව මත්පැන් අලෙවි කරන්නෙකි. නිරන්තරව නීතියේ රැහැනට අසුවුවද ඔහු හොර මත්පැන් ජාවාරම නතර නොකළේය.

හොර මත්පැන් පානය කිරීමට නිරන්තරව පැමිණෙන සුරාසොඬුන් සමග එකතුවී කාබී බාල් නැටීම ඔහුගේ එකම විනෝදාංශයයි.

එම අවස්ථාවලදී වාදනය කිරීම සඳහා හොඳ යක් බෙරයක්ද ඔහු සතුය. මේ පුද්ගලයා  සුරාපානයට මෙන්ම මස් අනුභවයටද අධික ලෙස ලොල් වී සිටින නිසා හැන්දෑ වන විට එම නිවසේ මුළුතැන්ගෙයි ළිප මත මස් හොද්දක් වරදින්නේ එහෙමත් දිනකය.

ඒවා නිසියාකාරව පිළියෙළ කරදීම බිරියගේ අත්හැරිය නොහැකි වගකීමක් වන අතර කිසියම් අඩුපාඩුවක් ඇය අතින් සිදුවුවහොත් ඇයටද දැඩි දඬුවම්වලට මුහුණ දෙන්නට සිදුවෙයි.

ඒ මොන තරම් අඩම්තේට්ටම්වලට ලක්වුවද ඇයද සිටින්නේ කැත්තට පොල්ල මෙන් කුමක් හෝ එකට එක කිරීමේ සූදානමෙනි.

මස් කෑමට මොහු කොතරම් කෑදරද යත් මස් හොද්ද ළිප තබා යාන්තම් රත්වන්නට පටන් ගත් මොහොතේ පටන් එය අනුභව කරන්නට පටන් ගනියි.

මත්වතුර සාජ්ජය ආරම්භ කර බෙර පදයක් ගසා අඩව්වක් අල්ලන හෙතෙම කුස්සියට දිවගොස් ළිපේ පැහෙන මස් හොද්දෙන් දීසියක් ගෙනැවිත් පිරිස සමඟ අනුභව කරන්නේ බිරියගේ රැවුම් ගෙරවුම් තඹයකට නොතකාය.

මේ ආකාරයට කෑම නිසා සාජ්ජය අවසන් වීමටත් පෙර හොද්දේ මස් කෑලි අහවරවීම සුලබ සිද්ධියකි. හැමදාමත් බිරිඳට ඉතුරුවෙන්නේ මස් හොදි පමණි.

මේ  නිසා පුරුෂයාට ⁣යස පාඩමක් ඉගැන්වීමට හිතා ගත් ඈ දිනක්  කොස් කපා ඉතුරුවූ කොස් වහල්ල මස් කෑලි තරමට කපා කලින් තම්බා සූදානම් කර ගත්තාය.

මස් හොද්දෙන් අඩක් අවසන් වන විට තම ප්‍රයෝජනයට මස් කෑලි ටිකක් භාජනයකට බෙදා සඟවා තබාගත් ඈ කොස් වහලු‍ කෑලි හොද්දට එකතු කළාය.

සුපුරුදු පරිදි බමන මතින් බෙර පදයක් ගසා අඩව්වක් අල්ලා කුස්සියට දිව ගිය පුරුෂයා මස් පීරිසියක් ගෙනැවිත් සහචරයන් සමඟ කන්නට විය.

අධික ලෙස මත් වී  සිටි බැවින් මස් හොද්දේ මහ වෙනසක්   කිසිවෙකුට දැනී නැතත් එක් අයෙක්”‍ මොකද බං මේ මස් නිකං දිය රහයි වගේ”‍ යැයි කීය.

එවිට ඔහු ‘‘ඔව් බං, මං හිතන්නෙ මුදලාලිය මට මේ සැරේ බාල කුකුළෙක් දීල තියෙන්නෙ, ඉඳපන්කො මං ඕකට හෙට ගිහින් හොඳවයින් දෙකක් කියන්න”‍ යැයි කියමින් තවත් බෙර පදයක් ගසා වරද්දමින් කවියක්ද කියනු අසා දොර මුල්ලේ විපරමෙන් සිටි බිරිඳ බඩ අල්ලා ගෙන සිනාසුණාය.