කරන්දෙණිය එම්. සුසිල් ප්‍රියන්ත
නිවසේ නතර කර තිබෙන රථ වාහනවල තෙල් අදින හොරා පොලිසියට අල්ලාදීමට ගොස් රෙදි ගලවා ගත් ව්‍යාපාරිකයකු  පිළිබඳව කතාවක් දකුණු පළාතෙන් අසන්නට ලැබේ.

ඔහු මධ්‍යම පන්තියේ ව්‍යාපාරිකයෙකි. මෝටර් රථයකට අමතරව යතුරුපැදි දෙකතුනක් ද ඔහුට තිබේ. තෙල් හිඟයක් ඇතත් ඔහුට නම් ප්‍රශ්නයක් නොවුවේ අතමිට තිබූ මුදල්වලට පින්සිදු වන්නටය.

ටැංකි පුරවා තිබෙන වාහනවල තෙල් හොරකම් කරන බවට ඔහුට දැනුණේ දින කිහිපයක සිටය. තෙල් හිඟ නිසා නවතා තිබෙන රථ වාහනවල තෙල් හොරකම් කර වැඩි මිලට විකුණන කල්ලි පිළිබඳව  ඔහුද දනුම්වත් වී සිටියේය. 

ඒ නිසාම සිය නිවෙසේ නවතා තිබෙන රථ වාහනවල තෙල් කවුරුන් හෝ හොරකම් කරනු ඇතැයි ඔහු සිතුවේය.
සිය වාහනවලින් තෙල් අදින හොරා අල්ලා ගැනීමට හේ පොලිසියේ පිහිට පැතීමට සිතා ගත්තේය .සී.සී.ටී.වී. කැමරා දර්ශන ඒ සඳහා සාක්ෂි ලෙස පොලිසියට ඉදිරිපත් කිරීමට ද ඔහුගේ සිහියට ආවේය.

තමන්ට සිය නිවෙසේ සවිකර තිබූ සී.සී.ටී.වී. කැමරාවේ පටිගත කෙරුණු  දර්ශන බලා ගැනීමට නොදන්නා නිසා ඔහු ඒ සඳහා ආයතනයක සහාය ලබා ගත්තේය. නිලධාරියා බොහෝම  සීරුමාරුවට පටිගත කෙරුණු සී.සී.ටී.වී. දර්ශන නිරීක්ෂණය කළේ ඔහු ඉදිරිපිටය .

තමන් දැක පුරුදු අයකු බටයක් රැගෙන යතුරුපැදියකින් තෙල් අදිනු ඔහුට දැකගන්නට ලැබිණ. දර්ශන තව තවත් පැහැදිලි වන ආකාරයට බලමින් සිටියදී ඔහුට අනේ දෙවියනේ කියවුණේ ඉබේටමය. මොකද සර් තෙල් අදින්නේ දන්න කෙනෙක්ද නිලධාරියා ඇසුවේය.

මහත්තයා අනේ කාටවත් කියන්න එපා මම ඉල්ලන ගානක් දෙන්නම් තෙල් අදින්නේ කොල්ලන් එක්ක රංචුවට යන මගේ පුතා යයි ඔහු කීවේය.

දුරදිග බලන්නේ නැතිව පොලිසි ගියා නම් සර්ට මාර වැඩක් තමයි වෙන්නේ යැයි කියමින් එම නිලධාරියා ඔහු දුන්නු වැඩිපුර මුදලත් අතමිට මොලවාගෙන ගියද ඒ පිළිබඳව තවත් කිහිපදෙනකුගේම කනේ තබා තිබිණ.