යොහාන් භාසුර

අපනයන සංවර්ධන මණ්ඩලය නව අපනයනකරුවන් සහ ව්‍යවසායකයන් සඳහා විවිධ නිෂ්පාදන අංශ පහක ස්ථාපිත අපනයනකරුවන් සමඟ ජාලගත කිරීමේ සහ දැනුම සැපයීමේ සැසියක් කොළඹදී පසුගියදා පැවැත්වීය.

තේ, කුළුබඩු සහ පොල් ආශ්‍රිත නිෂ්පාදන, සැකසූ ආහාර සහ කජු නිෂ්පාදන, විසිතුරු මාළු සහ ඖෂධීය සහ ආයුර්වේද නිෂ්පාදන අපනයනකරුවෝ මෙම සැසියටය සහභාගි වූහ.

නව අපනයනකරුවන්ට කර්මාන්තයේ ප්‍රබලයන්ගෙන් සෘජුවම ඉගෙනගැනීමට සහ ප්‍රායෝගික අවබෝධයක් ගැනීමට හොඳ අවස්ථාවක් මෙහිදී ලැබුණි.

මෙම සුවිශේෂී සැසිය සඳහා කුඩා හා මධ්‍ය පරිමාණ සෘජු අපනයනකරුවන් සහ වක්‍ර අපනයනකරුවන් ඇතුළු නව අපනයනකරුවන් සහ ව්‍යවසායකයන් 100 දෙනෙක් සහ ප්‍රමුඛ පෙළේ අපනයනකරුවෝ පැමිණ සිටියහ. ගෝලීය වෙළෙඳපොළේ සාර්ථක වීමට අත්‍යවශ්‍ය විවිධ මාතෘකා පිළිබඳ ඔවුන්ගේ විශේෂඥතාව බෙදාගත් කීර්තිමත් කථික මණ්ඩලයක් මෙම අවස්ථාවට සහභාගී වූහ.

විසිතුරු මත්ස්‍ය අංශයේ දශක ගණනාවක අත්දැකීම් ඇති ලු‍ම්බිණි ඇක්වේරියා ඉන්ටර්නැෂනල් (පෞද්ගලික) සමාගමේ සභාපති විභු පෙරේරා මහතා, ලු‍ම්බිණි ඇක්වේරියා ඉන්ටර්නැෂනල් ජාත්‍යන්තර වෙළෙඳපොළට ඇතුළු වී අභියෝගාත්මකව සාර්ථක වූ ආකාරය පිළිබඳ සැබෑ ජීවිත උදාහරණ බෙදා ගත්තේය. විසිතුරු මත්ස්‍ය අංශයේ නව අපනයනකරුවන් අවධානය යොමු කළ යුතු සියලු‍ම ප්‍රධාන ක්ෂේත්‍ර ඔහු ඉස්මතු කළේය.

බැසිලූර් තේ අපනයන (පෞද්ගලික) සමාගමේ අධ්‍යක්ෂ සුමිත් ජයවික්‍රම මහතා, තේ අංශයේ වසර 38 ක අත්දැකීම් සහභාගිවන්නන් සමග බෙදා ගත්තේය. දිගු කාලීනව තිරසාර අපනයන ව්‍යාපාරයක් ගොඩනගා පවත්වාගෙන යන්නේ කෙසේද යන්න පිළිබඳව ඔහු වටිනා දැනුමක් ලබා දුන්නේය. තරගකාරීව සිටීමට සහ දිගු කාලීනව ව්‍යාපාරයේ රැඳී සිටීමට නම්, පිරිවැය පරිස්සමෙන් කළමනාකරණය කිරීමට, මෙහෙයුම් කාර්යක්ෂමතාව වැඩි දියුණු කිරීමට සහ වෙළෙදපොළ වෙනස්කම්වලට අනුවර්තනය වීමට අපනයනකරුවන්ට උපදෙස් දුන්නේය.

කුළුබඩු සහ පොල් ආශ්‍රිත නිෂ්පාදන අංශයේ දශක ගණනාවක අත්දැකීම් ඇති, ඒකාබද්ධ කෘෂි නිෂ්පාදන ලංකා (පුද්ගලික) සමාගමේ කළමනාකාර අධ්‍යක්ෂ වර්නන් අබේරත්න මහතා, පවතින ව්‍යාපාරික හවුල්කාරිත්ව රඳවා ගැනීමට සහ වර්ධනය කිරීමට නිවැරදි ගැනුම්කරුවන් සොයා ගන්නේ කෙසේද සහ ශක්තිමත්, කල්පවතින සබඳතා ගොඩනගා ගන්නේ කෙසේද යන්න පැහැදිලි කළේය. ජාත්‍යන්තර ගනුදෙනුවලදී අවදානම අවම කිරීම සඳහා ආරක්ෂිත සහ විශ්වාසදායක ගෙවීම් ක්‍රම භාවිත කිරීමේ වැදගත්කම ද ඔහු සාකච්ඡා කළේය.

ලින්ක් නැචුරල් ප්‍රොඩක්ට්ස් පෞද්ගලික සමාගමේ ජ්‍යෙෂ්ඨ පර්‌යේෂණ විද්‍යාඥ චමරි වික්‍රමතිලක මහත්මිය, “ගෝලීය පාරිභෝගික විශ්වාසය ගොඩනැගීම සඳහා ගුණාත්මකභාවය ඉහළ නැංවීම” යන මැයෙන් සිය සැසියේදී අදහස් බෙදා ගත්තාය. නිෂ්පාදන කාර්යක්ෂමතාව සහ ආරක්ෂාව අවධාරණය කරමින් ලින්ක් නැචුරල් ප්‍රොඩක්ට්ස් ගෝලීය වෙළෙඳපොළ තුළ සාර්ථක වූ ආකාරය ඇය පැහැදිලි කළාය. ජාත්‍යන්තරව විශ්වාසයෙන් තරග කිරීම සඳහා පර්යේෂණ සහ සංවර්ධන සහ සහතික සඳහා ආයෝජනය කිරීමට ඇය ව්‍යවසායකයන් දිරිමත් කළාය.