විමුක්ති එස් රුද්‍රිගු

ශ්‍රී ලංකාවේ ආර්ථිකය ශක්තිමත් ලෙස යථා තත්වයට පත් කිරීමටත් ගෝලීය වේදිකාවේ එහි අපනයන තරඟකාරිත්වය පවත්වා ගැනීමටත් යුරෝපා සංගමයේ ජී.එස්.පී ප්ලස් සහනයේ උපායමාර්ගික වැදගත්කම ශ්‍රී ලංකා අපනයනකරුවන්ගේ ජාතික මණ්ඩලය පසුගියදා අවධාරණය කළේය.
ඉතිහාසයේ ඇතිවූ දරුණුතම ආර්ථික අර්බුදයෙන් පසුව මුහුණදීමට සිදුවූ පෙර නොවූවිරූ අභියෝග හමුවේ රට ස්ථාවර කිරීමට දරන උත්සාහයේදී ජී.එස්.පී ප්ලස් සහනය නැවත ලබා ගැනීම සඳහා සියලු‍ දෙනා එක්ව කටයුතු කළ යුතු බවත් ඒ සඳහා රජයට තම මණ්ඩලයේ පූර්ණ සහයෝගය හිමිවන බවත් ශ්‍රී ලංකා අපනයනකරුවන්ගේ ජාතික මණ්ඩලයේ ප්‍රකාශ කළේය.
ජී.එස්.පී ප්ලස් යනු මානව හිමිකම්, කම්කරු අයිතිවාසිකම්, පාරිසරික තිරසාරභාවය සහ යහපාලනයට අදාළ ජාත්‍යන්තර සම්මුතීන් 27 ක් ක්‍රියාත්මක කරන සංවර්ධනය වෙමින් පවතින රටවලට යුරෝපා සංගමය විසින් පිරිනමනු ලබන විශේෂ වෙ​ෙළඳ විධිවිධානයකි. එමගීන් ශ්‍රී ලංකාවට තීරුබදු රහිත පදනමක් මත නිෂ්පාදන 
6,000 කට වැඩි ගණනක් යුරෝපා සංගම් වෙළඳපොළට අපනයනය කිරීමට ඉඩ සැලසේ. වසර ගණන ප්‍රතිපත්තිමය ප්‍රතිසංස්කරණ ක්‍රියාත්මක කිරීමෙන් පසුව සහ සක්‍රීය රාජ්‍ය තාන්ත්‍රික ක්‍රියාකාරිත්වය ඔස්සේ 2017 වසරේදී නැවත වරක් ශ්‍රී ලංකාව ජී.එස්.පී ප්ලස් සහනය නැවත හිමිකර ගත්තේය.
ශ්‍රී ලංකා අපනයනකරුවන්ගේ ජාතික මණ්ඩලයේ සභාපති කෞෂාල් රාජපක්ෂ මහතා ප්‍රකාශ කර සිටියේ ශ්‍රී ලංකාව සිය ආර්ථිකය යථා තත්වයට පත්කර ගැනීමට යන ගමනේදී ජී.එස්.පී ප්ලස් සහනය ඉතා වැදගත් වනවා පමණක් නොව එය අත්‍යාවශ්‍ය බවය. 
ශ්‍රී ලංකා අපනයනකරුවන්ගේ ජාතික මණ්ඩලයේ ප්‍රධාන විධායක නිලධාරී සහ මහා ලේකම් ෂිහාම් මරිකාර් මහතා ප්‍රකාශ කර සිටියේ 2010 වසරේ ශ්‍රී ලංකාව සිදුකළ වැරදි නැවත වරක් සිදුවීමට ඉඩ නොතැබිය යුතු බවයි.