සිරියා රජයේ හමුදාව එරට ඇලෙප්පෝ දිස්ති‍්‍රක්කයට ඊයේ (21) එල්ල කළ මිසයිල ප‍්‍රහාර මාලාවකින් සිවිල් වැසියන් 20 දෙනකු ජීවිතක්ෂයට පත් වූයේ යැයි එරට කැරැලිකාර පාර්ශ්වය නියෝජනය කරන විපක්ෂ දේශපාලන කණ්ඩායම් පවසයි.
ඇලෙප්පෝ දිස්ති‍්‍රක්කයට එල්ල වී ඇත්තේ සිරියා හමුදාව සතු රුසියාවේ නිෂ්පාදිත ‘ස්කුඞ්’ මිසයිලය. එම මිසයිල ප‍්‍රහාරයෙන් දීර් අ සෝර් නමැති ප‍්‍රදේශයේ මහල් ගොඩනැගිලි දෙකක් මුළුමනින්ම බිමට සමතලා විය. 
විපක්ෂ කි‍්‍රයාකාරීන් පවසන්නේ තවත් පුද්ගලයන් 25 දෙනකු පමණ සුන්බුන් අතර සිරවී සිටින බවය.
‘ස්කුඞ්’ යනු දිගු දුර මියසිල වර්ගයකි. සිරියා රජය එම දිගු දුර මියසිල යොදා ගනිමින් කැරැලිකරුවන්ට පහර දීම ආරම්භ කළේ ඉකුත් වසරේ දෙසැම්බර් මාසයේ සිටය.
මාස 21 කට වැඩි කාලයක් තිස්සේ සිරියාවේ පවතින ගැටුම්වලට පැහැදිලි විසඳුමක් ලබා දීමට සිරියානු ජනපති බෂීර් අල් අසාද්ගේ රජය අපොහොසත් නම්, ඔවුන් ජාත්‍යන්තර අපරාධ අධිකරණය හමුවට ඉදිරිපත් කළ යුතු යැයි එක්සත් ජාතීන්ගේ ආරක්ෂක මණ්ඩලය පවසා තිබේ.
සිරියා ජනපතිගේ රජය මිනිස් ඝාතන සිදු කරමින්, මානව වර්ගයාට එරෙහිව අපරාධ සිදු කරන බවටත්, බලයෙන් ඉවත් වීම ප‍්‍රතික්ෂේප කරන එරට ජනාධිපති අසාද් ඇතුළු ඉහළ පෙළේ රාජ්‍ය සහ ආරක්ෂක නිලධාරීන් ඊට වගකිව යුතු යැයි මානව හිමිකම් සංවිධාන චෝදනා කරයි.
එම නිසා සිරියා ජනපති ඇතුළු පිරිස හේග් නුවර කේන්ද්‍රකොට පිහිටුවා ඇති ජාත්‍යන්තර අපරාධ අධිකරණය හමුවට ඉදිරිපත් කළ යුතු යැයි එක්සත් ජාතීන්ගේ ආරක්ෂක මණ්ඩලය කළ යෝජනාවට එහි සාමාජික රටවල් 50 ක් කැමැත්ත පළ කළ ඇතැයි ද වාර්තා වේ.
සිරියානු රජය එරට සිවිල් වැසියන්ට එරෙහිව කුරිරු ලෙස අපරාධ සිදු කරන බවටත්, ඔවුන් ඉලක්ක කර ගනිමින් ප‍්‍රහාර එල්ල කරන බවටත් කාන්තාවන් වධ බන්ධනයන්ට ලක් කරන බවටත් චෝදනා එල්ල වෙමින් පවතී.
අරාබි වසන්තය හරහා සිරියානු අර්බුදය ආරම්භ වූයේ 2011 වසරේ මාර්තු මාසයේදීය. සිරියානු විපක්ෂ කණ්ඩායම්, මානව කි‍්‍රයාකාරීන් ආයුධ අතට ගෙන සිරියා රජයට එරෙහිව සටන් ආරම්භ කිරීමත් සමඟ සිරියා රජය එම කැරැලිකරුවන්ට ප‍්‍රතිප‍්‍රහාර එල්ල කරන්න විය.
එක්සත් ජාතීන්ගේ සංවිධානය පවසන්නේ මේ වනවිට 70,000 කට වැඩි පිරිසක් ජීවිතක්ෂයට පත්ව ඇති බවය.