ලෝක බැංකු අධිපති පදවියට කෙනකු පත් කර ගැනීම සඳහා ඇමෙරිකාව ඉමහත් දුෂ්කරතාවකට මුහුණ දී සිටියි. ලෝක බැංකුවේ වත්මන් අධිපති රොබට් සූලික්ගේ නිල කාලය මේ වසරේ ජූලි 30 වැනිදා අවසන් වේ. තම නිල කාලය තවත් දීර්ඝ කර ගන්නේ නැතැයි සූලික් පවසා ඇත. සාම්ප‍්‍රදායික ලෙස ලෝක බැංකු අධිපති පදවියට පත් කෙරෙන්නේ ඇමෙරිකා රජයේ හිතවාදියෙකි. ඔබාමා පරිපාලනය එම තනතුරට තිදෙනකු නම් කර ඇති නමුත් ඔවුහු තිදෙනාම එම තනතුර ලබා ගැනීමට මැලිවෙති. ඔවුන් තිදෙනාගෙන් එක් අයකු වන්නේ ඇමෙරිකා රාජ්‍ය ලේකම් ධුරය වෙනුවෙන් තරඟ කිරීමට සැරසෙන සූසන් රෝස්ය. අනෙකා ඇමෙරිකා ආර්ථික විශේෂඥයකු වන ලොරන්ස් සමර්ස්ය. කෙසේ නමුත් ඇමෙරිකා රජයට ගැටලූවක් වී ඇත්තේ නතතුරු භාර ගැනීමට ඇමෙරිකාවේ විපක්ෂ හිතවාදී ජෙෆ්රි සැෂේ කැමැත්ත පළ කර තිබීමය. සැෂේට සංවර්ධනය වෙමින් පවතින රටවල සහාය ලැබෙන අතර ඔහුට එම තනතුර හිමි වුවහොත් ඇමෙරිකා රජයට, ඔහුට බලපෑම් කිරීමට නොහැකි වේ. එක්සත් ජාතීන්ගේ සහස‍්‍ර සංවර්ධන අරමුණු වැඩසටහන්වල ද නායකත්වය දැරූ ජෙෆ්රි සැෂේට, මැලේසියාව, ජෝර්දානය, නැගෙනහිර ටිමෝරය සහ කෙන්යාව වැනි රටවල සහාය දැනටමත් හිමි වී ඇත. ලෝක බැංකු අධිපති පදවිය වෙනුවෙන් නාම යෝජනා භාර ගැනීම එළැඹෙන 23 වැනිදා අවසන් වේ.