න්‍යෂ්ටික අවි මෙළොවින් අතුගා දැමිය යුතු බවත් ඒ සඳහා වූ ඇමෙරිකාවේ දායකත්වය ඉතා අවම මට්ටමක පවතින බවත් සෝවියට් රුසියවේ හිටපු ජනපතිවරයකු වන මිහායිල් ගොර්බචොව් පෙරේදා(9) පැවැසීය. න්‍යෂ්ටික අත්හදා බැලීම් තහනම් කිරීම සම්බන්ධයෙන් වන ආයතනයක් සමඟ පැවැති වීඩියෝ සාකච්ඡාවකදී හිටපු ජනපතිවරයා මේ බව කියා සිටියේය. ‘මේ වන විට නවීනතම අවිආයුදවලින් සන්නද්ධ සෑම රාජ්‍යකටම ඉහළින් සිටින රට වන්නේ අමෙරිකාවයි. න්‍යෂ්ටික අවි පාලනය කිරීමේ හැකියාව ඇත්තේ ද ඇමෙරිකාවට වූවත් ඔවුන් ඉන් ඉවත්ව සිටිනවා.’යැයි ද ගොර්බචොව් සඳහන් කළේය. 1986 වසරේදී සෝවියට් ජනපති ගොර්බචොව් සහ ඇමෙරිකා ජනපති රොනල්ඞ් රේගන් එකිනෙකා හමුවී සාකච්ඡා කළ රෙක්ජාවික් සමුළුව පිළිබඳව සිදු කළ මෙම වීඩියෝ සංවාදයේදී ගොර්බචොව් රුසියන් බසින් අදහස් දැක්වූ බව විදෙස් වාර්තා සඳහන් කරයි. ලෝක බලවතුන් සතුව මේ වන විට න්‍යෂ්ටික යුද ශීර්ෂ 20,000කට අධික ප‍්‍රමාණයක් තිබෙන අතර දින කිහිපයකින් අපගේ මුළු ශිෂ්ටාචාරයම වළලා දැමීමේ හැකියාවක් ඒවා සතු බව ද ගොර්බචොව් කියා සිටියේය. න්‍යෂ්ටික අත්හදා බැලීම්වලින් වැළකී සිටිමේ පනතට මේ වන විට ලොව රටවල් 200ක් පමණ අස්සන් කර ඇත. නමුත් න්‍යෂ්ටික බලය බහුලව භාවිත කරන රාජ්‍යයන් වන අමෙරිකාව, ඉන්දියාව, චීනය, ඉරානය සහ ඊශ‍්‍රායලය යන රටවල් ඒවා සීමා කිරීමට හෝ තහනම් කිරීමට පියවර නොගැනීම මුළු ලෝකයටම අනතුරුදායක තත්ත්වයක් මතු කර ඇතැයි ද ගොර්බචොව් පෙන්වා දෙයි.