2023 පෙබරවාරි මස 03 වන සිකුරාදා
සති ගණනක් මුළුල්ලේ පැවැති ගැටුම්වලින් පසු ඩැමැස්කම් නුවර හා ඇලෙප්පෝ නගරය සම්බන්ධ කරන ප්‍රධාන මාර්ගයක පාලනය සියතට ගැනීම සිරියානු රජයේ හමුදා සමත්ව ඇත.
මෙම මාර්ග පද්ධතිය යළි සියතට ගැනීම සඳහා සිරියානු රජයේ හමුදා රුසියානු හමුදා සමඟ ඉඞ්ලිබ් පළාතට දැවැන්ත ප්‍රහාර මාලාවක් එල්ල කළේය.
එම ප්‍රහාරවලින් ඉරිදා පමණක් සිවිල් වැසියන් 20ක ආසන්න පිරිසක් ජීවිතක්ෂයට පත්වූ බව මානව හිමිකම් නිරීක්ෂණය සඳහා වූ සිරියානු සංවිධානය නිවේදනය කළේය. එය බ්‍රිතාන්‍ය කේන්ද්‍ර කරගනිමින් ක්‍රියාත්මක වන සංවිධානයකි.
සති ගණනක් මුළුල්ලේ මෙම ගැටුම් පවතී. මෙම මාර්ග පද්ධතිය එම් 5 යනුවෙන් හඳුන්වන අතර සිරියාවේ ආර්ථික කේන්ද්‍රස්ථානය වන ඇලෙප්පෝ සහ ඩැමැස්කස් නගරය සම්බන්ධ කරන අතර එය ජෝර්දාන දේශසීමාවට ද සම්බන්ධ වේ.
කෙසේ නමුත් මාර්ග පද්ධතියේ ඇලෙප්පෝ නගරයේ නිරිත දිග පිහිටි කොටස තවමත් ඇත්තේ කැරැලිකරුවන්ගේ සහ ජිහාද් සටන්කාමීන්ගේ පාලනයේ ය. ඉඞ්ලිබ් පළාතේ හරි මැදට වන්නට මේ කොටස පිහිටා තිබෙන අතර ජනාකීර්ණ ය.
සිරියානු රෙජීමයට හිතවත් කණ්ඩායම් දිගින් දිගටම ප්‍රහාර එල්ල කිරීමත් සමඟ ලක්ෂ පහකට වැඩි පිරිසක් මේ වනවිටත් උතුරට වන්නට පිහිටි තුර්කි දේශසීමාව දෙසට පලායමින් සිටිති.
සිරියානු රෙජීමයට සහාය දක්වන රුසියානු හමුදා එල්ල කළ තවත් ප්‍රහාරයකින් ඉරිදා 14 දෙනෙක් මරුමුවට පත්වූහ.
සිරියානු ගුවන් හමුදා බැරැල් බෝම්බ යොදාගනිමින් කළ ප්‍රහාරයකින් සිවිල් වැසියන් 4 දෙනෙක් ජීවිතක්ෂයට පත්වූහ. මේ අයුරින් සිරියානු රජයේ හමුදා සහ රුසියානු හමුදා එල්ල කළ ප්‍රහාරවලින් ඉරිදා පමණක් සිවිල් වැසියන් 20 දෙනකු ජීවිතක්ෂයට පත්වූ බව මානව හිමිකම් නිරීක්ෂණය සඳහා වූ සිරියානු සංවිධානය සඳහන් කළේය.
ඒ.එෆ්.පී.
055
