(අජන්ත කුමාර අගලකඩ)
හම්බන්තොට වරාය චයිනා මර්චන්ට් සමාගමට බදුදීමේ සංශෝධිත ගිවිසුමේ කොටුම්පත වරාය අමාත්‍යාංශයේ අනුමැතිය සඳහා යොමුකර ඇතැයි රජයේ ආරංචි මාර්ග කියයි.

වරාය අමාත්‍යාංශයේ අනුමැතිය ලැබුණහොත් අදාළ ගිවිසුම අනිද්දා (09) පැවැත්වෙන කැබිනට් මණ්ඩලයේ අනුමැතිය සඳහා ඉදිරිපත් කෙරෙනු ඇතැයි ද එම ආරංචි මාර්ග සඳහන් කරයි.

හම්බන්තොට වරාය චයිනා මර්චන්ට් සමාගමට බදුදීම සඳහා මුලින් සකස් කරන ලද ගිවිසුමට එල්ල වූ විරෝධතා හේතුවෙන්, එහි සංශෝධන ගණනාවක් සිදුකිරීමට රජය තීරණය කර තිබිණි.

වරාය බදුදීමේ දී සියයට 80ක් චයිනා මර්චන්ට් සමාගමට ද ඉතිරි සියයට 20 වරාය අධිකාරියට ද ලබාදීමට මුලින් තීරණය කර තිබුණද එය චයිනා මර්චන්ට් සමාගමට සියයට 60ක් හා වරාය අධිකාරියට සියයට 40ක් වශයෙන් සංශෝධනය කර ඇතැයි වාර්තාවේ.

වසර 99කට බදුදීමට කර තිබූ යෝජනාව ද වසර 70ක් සහ 29ක් වශයෙන් අදියර දෙකකට ක්‍රියාත්මක කිරීමට ද සංශෝධන ගිවිසුම යටතේ යෝජනා කර ඇතැයි දැන ගන්නට තිබේ.

අගමැති රනිල් වික්‍රමසිංහ මහතා ලබන 13 වැනිදා චීනයේ සංචාරයක නිරතවීමට නියමිත අතර, අගමැතිවරයාගේ එම සංචාරයට පෙර වරාය ගිවිසුම සම්බන්ධයෙන් අවසන් එකඟතාවක් ඇතිකර ගැනීම රජයේ අපේක්‍ෂාව වී ඇතැයි ද රජයේ ආරංචි මාර්ග කියයි.