(දයාසීලි ලියනගේ)  
හම්බන්තොට වරායෙන් නැව්වලට තෙල් විකිණීම දියුණුකර ගතහොත් රටේ ණය බර නිදහස් කරගත හැකි බව වෘත්තීය සමිති ජනාධිපති මෛත්‍රීපාල සිරිසේන මහතාට පෙන්වා දී ඇත.  

දිනකට නැව් 300ක් පමණ ප්‍රමාණයක් හම්බන්තොට වරාය අසලින් ගමන් කරනු ලබන අතර එයින් එක් නැවකට තෙල් සැපවුවහොත් රුපියල් මිලියන 4ක ලාභයක් හිමිවන බව ඛණිජ තෙල් පොදු සේවක සංගමයේ කඳවුම්කරු ඩී.ජේ. රාජකරුණා මහතා කීය.  

මලක්කා සමුද්‍ර සන්දිය මගහැර කෙටි මගකින් යාමට තායිලන්තය හරහා නාවික ගමනාගමනයට ඇළ මාර්ගයක් කපමින් සිටින අතර ඒ ඔස්සේ නැව් ගමන් කිරීමෙන් කිලෝමීටර් 1200ක දුරක් අඩුවන අතර, ඒ සියලු නැව් හම්බන්තොට වරාය අසලින් ගමන් කරනු ඇතැයි ද ඔහු කීය.  වර්ෂ 2016 අගෝස්තු මාසයේදී පමණක් නැව්වලට තෙල් ටොන් 35000ක් ලබාදීමෙන් වරාය අධිකාරිය රුපියල් බිලියනයක ලාභයක් ලබා තිබූ අතර, ඉන්පසුව හම්බන්තොට වරායෙන් තෙල් නිකුත් කිරීම අත්හිටුවා තිබිණි.  

හම්බන්තොට වරායෙන් නැව්වලට තෙල් නිකුත් කිරීම ආරම්භ කළහොත් රටේ ණය බර පහසුවෙන් නිදහස් විය හැකිවන බවද රාජකරුණා මහතා කීය.  

තෙල් පිරිපහදුව අලුත්වැඩියාවට ඩොලර් මිලියන 2000ක් වැය වන බව ගණන් බලා ඇති අතර, ඒ වැය වන මුදල වසර 5කින් උපයා ගත හැකි බවද ඔහු කීය.