(මහින්ද නිශ්ශංක)  

සීමාවකින් තොරව පසුගිය කාලය තුළ මෙරටට සීනි ආනයනය කිරීම සඳහා බලපත්‍ර නිකුත් කිරීම සහ එයට අදාළ දඩ මුදල් අය කිරීමෙන් ආනයන අපනයන පාලන දෙපාර්තමේන්තුව රුපියල් කෝටි 100කට අධික ආදායමක් උපයා ගෙන ඇතැයි වාර්තා වේ.  

සීනි කිලෝවක ආනයන බද්ද රුපියල් 50 සිට ශත 25 දක්වා අඩු කිරීමෙන් පසුව හත් අට දෙනකු වශයෙන් සිටි ආනයනකරුවන් සංඛ්‍යාව 53ක් පමණ දක්වා වැඩිවීමෙන් සීනි ආනයන බලපත්‍ර ප්‍රමාණය ද ඉහළ ගොස් ඇති බවත් දැනගන්නට ඇත.  

ඉකුත් වසරේ ඔක්තෝබර් 13 වැනිදා සිට ක්‍රියාත්මක වන පරිදි සීනි කිලෝවක ආනයන බද්ද ශත 25 දක්වා පහත හෙළීම තුළ සීමාවකින් තොරව සීනි ආනයනය සිදු වූ අතර ඉකුත් මාස 8ක පමණ කාලය තුළ ඔවුන් විසින් සීනි මෙ.ටො. 5,50,000ක පමණ තොගයක් ආනයනය කර ඇති බව ආනයනකරුවන්ගේ ආරංචි මාර්ග සඳහන් කරයි.  
මේ අතර සීනි ආනයනය ඉකුත් 22 වැනිදා සිට යළි තහනම් කර ඇති අතර මේ වනවිට ආනයනකරුවන් සතුව මාස 3කට ප්‍රමාණවත් සීනි තොග තිබෙන බව ද වාර්තා වේ.