(අජන්ත කුමාර අගලකඩ) 
විදුලිබල අවශ්‍යතාව සඳහා මෙගා වොට් 100ක සූර්ය බල උද්‍යානයක් මන්නාරමේ ඉදිකිරීමට විදුලිබල අමාත්‍යංශය ගෙනා යෝජනාවකට ඇමැති රිෂාද් බදියුදීන් මහතා කැබිනට් රැස්වීමේ දී දැඩි විරෝධය පළකර ඇතැයි වාර්තාවේ. 

මෙම ව්‍යාපෘතිය හේතුවෙන් මන්නාරමේ පරිසරයට හානි වන බවත්, ආගමික නායකයින්ද ව්‍යාපෘතියට විරුද්ධ බවත් බදියුදීන් ඇමැතිවරයා කැබිනට් රැස්වීමේදී ප්‍රකාශ කර ඇතැයි දැනගන්නට තිබේ. 


විදුලිබල හා බලශක්ති ඇමැති රංජිත් සියඹලාපිටිය මහතා නොසිටි බැවින්, වැඩබලන විදුලිබල ඇමැතිවරයා ලෙස අජිත් පී. පෙරේරා මහතා අදාළ ව්‍යාපෘති යෝජනාව කැබිනට් මණ්ඩලය වෙත ඉදිරිපත් කර තිබිණි. 


ඊට දැඩි විරෝධය පළකර ඇති රිෂාද් බදියුදීන් මහතා මෙය අධ්‍යයනය කිරීමට තවත් කාලය අවශ්‍ය යැයි ප්‍රකාශ කර ඇත. 


පාඨලී චම්පික රණවක, ආචාර්ය සරත් අමුණුගම යන මහත්වරුන් ඇතුළු ඇමැතිවරුන් කිහිපදෙනෙකු රිෂාද් බදියුදීන් ඇමැතිවරයාගේ අදහසට විරෝධය පළකර ඇති බවද වාර්තා වේ.