ශ්‍රී ජයවර්ධනපුර සිට දිවෙන නව නුවර පාරත්, කොළඹ-මහනුවර මාර්ගයත් එකට හමුවන ගම්පහ බැලුම්මහර හන්දිය වර්ෂා දිනවලදී ඌරුවල් ඔය පිටාර ගැලීමත් සමඟ ජලයෙන් යටවන අතර තත්ත්වය එසේ තිබියදීත් එම ජලය බැසයාමේ මාර්ගය අවහිර කරමින් අනවසරයෙන් ඉදිකරන ගොඩනැගිල්ලක් ඉදිකිරීම තහනම් කර තිබියදීත් ඉදිවෙමින් තිබේ.

ප්‍රදේශයේ ගොවි ජනතාව මේ ඉදිකිරීමට දැඩි විරෝධය පා සියලු රාජ්‍ය ආයතන දැනුම්වත් කිරීමේ ප්‍රතිඵලයක් මත ගොවිජන සේවා කොමසාරිස් ජනරාල්වරයා විසින් එම ඉදිකිරීම 2015.09.16 දින සිට තහනම් කරන ලදී. ගම්පහ දිසා ලේකම්වරයා ද මෙම අනවසර ඉදිකිරීමට දැඩි විරෝධය පා ඊට එරෙහි නියෝග ලබාදුන්නත් තවමත් මෙම ඉදිකිරීම නොනවත්වා ක්‍රියාත්මක වෙමින් තිබේ.

ගම්පහ ආසනයේ ප්‍රධාන පක්‍ෂ දෙකේම දේශපාලන නායකයන් ඍජුවම මෙම ඉදිකිරීම නීතිවිරෝධී බව ප්‍රකාශ කර තිබුණද, ගම්පහ දිස්ත්‍රික් සංවර්ධන කමිටුවේදී ද මෙම ඉදිකිරීම නීතිවිරෝධී එකක් බව ප්‍රකාශ කර තිබුණත් තවමත් මේ අනවසර ඉදිකිරීම සිදුකරන්නේ කෙසේදැයි ජනතාව ප්‍රශ්න කරති.

මෙම ඉදිකිරීම සිදුවූවහොත් බැලුම්මහර මංසන්ධිය ජලයෙන් යටවී මහා විපතක් සිදුවිය හැකි බව පෙන්වා දිය යුතුය.

දොම්පේ - අජිත් මදුරප්පෙරුම