(රංජිත් රාජපක්ෂ)                      

ඒ.ටී.එම් කාඩ් පතක් සොරකම් කර රාජ්‍ය බැංකුවකින් මුදල් ලබා ගත් සැකකරුවෙක් අද (30) අත්අඩංගුවට ගත් බව හැටන් පොලිසිය කියයි.

හැටන් ෆෘට්හිල් වත්තේ පදිංචි 66 හැවිරිදි අයෙකුගේ ඒ.ටී.එම් කාඩ් පත සැකකරු විසින් සොරකම් කර හැටන් සහ අවිස්සාවේල්ල යන නගර වලදී අවස්ථා කිහිපයකදී අදාල කාඩ් පත භාවිතා කර මුදල් ලබාගෙන ඇති බව හැටන් පොලිසිය පැවැසීය.

ඒ.ටී.එම් යන්ත්‍රයෙන් සැකකරු මුදල් ලබා ගන්නා අයුරු සී.සී.ටී.වී දර්ශන ඔස්සේ සැකකරු හඳුනාගෙන සැකකරු සොයා මෙහෙයුමක් පොලිසිය විසින් දියත් කර තිබුණි.

සැකකරු හැටන් ප්‍රදේශයේම පදිංචිකරුවෙකු වන අතර සැකකරු මුදල් ලබා ගැනීමෙන් අනතුරුව ප්‍රදේශයෙන් පලාගොස් සිටියදී අද (30) ආපසු හැටන් නගරය වෙත පැමිණ සිටි අවස්ථාවේ පොලිස් නිලධාරීන් විසින් සැකකරු  අත්අඩංගුවට ගෙන ප්‍රශ්න කිරීමේදී සැකකරු විසින් සොරාගන්නා ලද ඒ.ටී.එම් කාඩ් පත සහ සැකකරු  විසින්  ලබාගත් මුදල් වලින් රුලියල්  එක් ලක්ෂ විසි දෙදහසක මුදලක් ඔහු සන්තකයේ තිබී පොලිසිය විසින් සොයාගෙන ඇත.

අත්අඩංගුවට ගත් සැකකරු හැටන් මහෙස්ත්‍රාත් අධිකරණය වෙත ඉදිරිපත් කරන බව හැටන් පොලිසියේ අපරාධ විමර්ෂන අංශයේ නිලධාරියෙක් පැවසීය.