(අජන්ත කුමාර අගලකඩ)

සිර දඬුවම් විඳින සහ රිමාන්ඩ් සිරකරුවන් බන්ධනාගාරය තුළ මිශ්‍රවීමට සැලසීම කිසිසේත් නොකළ යුතු යැයි මහර බන්ධනාගාර ගැටුම සම්බන්ධයෙන් සොයා බැලීමට පත් කළ කමිටුව විසින් සිය අවසන් වාර්තාවෙන් නිර්දේශ කර ඇත.

මේ අතර බරපතළ අපරාධ චෝදනාවලට සම්බන්ධ සැකකරුවන් අධි ආරක්ෂිත බන්ධනාගාරයක තැබිය යුතු යැයි ද එම කමිටුව නිර්දේශ කර තිබේ.

රැඳවියන් හමුවීමට පැමිණෙන නීතිඥවරුන්ට දැනට වඩා ක්‍රමවත් ආකාරයට ඒ සඳහා පහසුකම් සැලසිය යුතු බව ද කමිටුව නිර්දේශ කර ඇත.

බන්ධනාගාරයට එළවළු සැපයීම බන්ධනාගාරය ගොවි පොළවලින් පමණක් සිදු කරන්නැයි ද ඒ සඳහා මහ පරිමාණ ගොවිපොළවල් ඇති කොට රැඳවියන් යොදාගෙන ඔවුන්ට ප්‍රමාණවත් වැටුපක් ලබාදෙන්නැයි ද කමිටුව සිය වාර්තාවෙන් නිර්දේශ කර ඇත.

මේ අතර මත්ද්‍රව්‍යවලට ඇබ්බැහිවූවන් විශාල පිරිසක් රිමාන්ඩ් බන්ධනාගාරවල සිටින බැවින් ඔවුන් රෝගීන් වශයෙන් සලකා අනිවාර්යයෙන්ම පුනරුත්ථාපනය කළ යුතු බවට ද කමිටුව නිර්දේශ කර ඇත.