(මුදිතා දයානන්ද)

රටේ උද්ගතව ඇති තත්ත්වය හමුවේ මහමැතිවරණය පැවැත්වීම සම්බන්ධයෙන් මැතිවරණ කොමසාරිස්වරයා තීරණයක් ගත යුතුව ඇතැයි ජනතා විමුක්ති පෙරමුණේ නායක, හිටපු පාර්ලිමේන්තු මන්ත්‍රී අනුර කුමාර  දිසානායක මහතා අද  (16) පැවසීය.

ඔහු මේ බව පැවසුයේ පැලවත්තේ පිහිටි ජනතා විමුක්ති පෙරමුණේ ප්‍රධාන කාර්යාලයේ දී පැවති මාධ්‍ය හමුවකදීය.

එහිදී ඔහු මෙසේද පැවසීය.

කොරෝනා වෛරසය පැතිරීම වැළැක්වීම සඳහා රජය ගෙන ඇති ක්‍රියාමාර්ගවලට අනුව කටයුතු කිරිම සඳහාත්, ජනතාව විපතට පත්වීම වැළැක්විම සඳහාත් අපි මහමැතිවරණය වෙනුවෙන් රැස්වීම්, ජනහමු, පැවැත්වීම නැවැත්තුවා. ඒ වගේම ගෙන් ගෙට ගොස් ජනතාව දැනුවත් කිරිමේ වැඩසටහනත් නවතා දැමුවා. එය අප මේ මොහොතේ කළ යුතුම දෙයක්.

එහෙත් මැතිවරණයක් අවස්ථාවකදී මේ ක්‍රියාමාර්ග හැර ජනතාව දැනුවත් කිරිමටත් ප්‍රචාරක කටයුතු සිදුකිරිමටත් වෙනත් මාර්ගයක් අපිට නැහැ. අපිට නෙවෙයි හැම දේශපාලන පක්ෂයකටම මේ ප්‍රශ්නය බලපානවා. මෙවැනි තත්ත්වයක් යටතේ මැතිවරණයක් පවත්වන්නේ කෙසේද කියලා ප්‍රශ්නයක් තිබෙනවා. මුදල් හදල් ඇති, මාධ්‍ය ඇති දේශපාලන ව්‍යාපාර ඒවා භාවිතා කර යම් ප්‍රචාරක වාසියක් ගනිද්දී ඒ හැකියාව නැති දේශපාලන ව්‍යාපාරවලට ජනතාව අතරට යන්න කිසිම මාර්ගයක් නැහැ.

ඒ වගේම මේ වෙලාවේ ජනතාව තුළත් මැතිවරණ මානසිකත්වයක් නැහැ. ඔවුන් තුළ මේ වෙලාවේ ප්‍රමුඛව තිබෙන්නේ මේ වෛරසය පිළිබඳ හැගීම් පමණයි. මැතිවරණයක් පවත්වන්න පුලුවන්ද කියන හැගීමක් බොහෝ දෙනා තුළ තිබෙනවා. ඒ නිසා හැමෝම අහන්නේ මැතිවරණය පවත්වයිද නැද්ද කියලයි. මැතිවරණය සම්බන්ධයෙන් තීරණයක් ගත හැක්කේ මැතිවරණ කොමිසමටයි. ඒ නිසා මේ සියල්ල සළකා බලා වහා තීරණයක් ගන්නා ලෙස මැතිවරණ කොමිසමෙන් ඉල්ලා සිටිනවා.