(සමන් පාලිත නානායක්කාර )

බණ්ඩාරවෙල පොලිස් අධිකාරී කොට්ඨාසයට අයත් බොරලන්ද ප්‍රදේශයේ ඖෂධ අලෙවිසැලක් වටලා  මත් පෙති 2,997 සමඟ එහි හිමිකරු අද (15) සැකපිට අත්අඩංගුවට ගත් බව බණ්ඩාරවෙල  කොට්ඨාස අපරාධ විමර්ශන අංශය කියයි.

 මත් පෙති දහයක පැකට්ටුවක් රුපියල් 600 ක මිලකට අලෙවි කරන බවත් පොලිසියට අනාවරණය වී තිබේ.

සැකකරු බොරලන්ද ප්‍රදේශයම අයෙකු බවද පොලිසිය කියයි.

 සංචරණයට සීමාවන්  පනවා ඇති  නිසා  කුඩු හිඟ වී ඇති  බැවින් මත් කුඩු වලට ඇබ්බැහි වූවන් මෙම මත්පෙති වැඩි වශයෙන් මිලදී ගන්නා බවට පොලීසියට තොරතුරු ලැබී තිබේ.

බණ්ඩාරවෙල, හපුතලේ ,දියතලාව, වැලිමඩ, බෝගහකුඹුර,  කැප්පෙටිපොළ  ප්‍රදේශවල සිට පැමිණෙන මත්ද්‍රව්‍ය වලට ඇබ්බැහි වූවන් මෙම ෆාමසියෙන් මත් පෙති  ලබාගෙන ඇති බවටද පොලිසියට තොරතුරු අනාවරණය වී තිබේ. 

සැකකරු  අද බණ්ඩාරවෙල මහේස්ත්‍රාත් අධිකරණය හමුවට ඉදිරිපත් කිරීමට නියමිත බවත් පොලිසිය කියයි.